हिंगणा (जि. नागपूर) : मित्रांसोबत धाब्यावर जेवायला जाणे एका युवकाला चांगलेच महागात पडले. अपघात होऊन गाडी उलटल्याने यश राजेंद्र राहाटे (वय 22, रा. गोपालनगर, नागपूर) या युवकाचा मृत्यू झाला. तर दोन मुली गंभीर जखमी आहेत. अन्य चौघांनाही चांगलाच मार लागला आहे. सर्व युवक एकमेकांचे मित्र असून ते शहरातील रहिवासी आहेत. 

प्राप्त माहितीनुसार, ही घटना 28 फेब्रुवारीला मध्यरात्री घडली. नागपूर येथील युवक व युवती जिप्सी गाडीने जेवणासाठी वर्धा रोडवरील एमसीसीपी फूड ढाबा येथे गेले होते. यात 22 ते 24 वयोगटातील दोन तरुणी व पाच तरुण होते. घरी परतताना गौसी मानापूर शिवारात जिप्सीवरील नियंत्रण सुटल्याने जिप्सी पलटली. यात यश राजेंद्र राहाटे हा गंभीर जखमी झाला. त्याला वर्धा रोडवरील कल्पवृक्ष हॉस्पिटल येथे उपचारासाठी दाखल केले असता डॉक्‍टरने मृत घोषित केले. 

- प्रेयसीच्या खर्चासाठी 'त्याने' केल्या शंभरावर चोऱ्या

काही युवक किरकोळ जखमी झाले. यात अविनाश अय्यर (वय 24, रा. विनायकनगर नागपूर), आनंद गायधने (वय 24, रा. गोपालनगर नागपूर), अंकित तुपकर (वय 24, रा. वर्धमाननगर नागपूर), हर्षल ठवरे (वय 24, रा. मानेवाडा नागपूर), मोहिनी माहूरकर (वय 24, रा. नीरी कॉलनी, लक्ष्मीनगर, नागपूर), शिवानी गिरीपुंजे (वय 24, रा. छत्रपती चौक नागपूर) यांचा समावेश आहे. त्यांना नजीकच्या विवेकानंद हॉस्पिटल येथे उपचारासाठी दाखल करण्यात आले होते. 

हर्षल ठवरे जिप्सी चालवत होता. पुढील तपास पोलिस निरीक्षक सरीन दुर्गे यांच्या मार्गदर्शनाखाली अरविंद घिये करीत आहेत. अपघातात मृत पावलेला यश याचे वडील राजेंद्र राहाटे महापालिकेत अभियंता म्हणून कार्यरत आहे. तरुण मुलगा गेल्याने त्यांच्यावर दुःखाचा डोंगर कोसळला आहे.