नागपूर : कोरोनाच्या पार्श्‍वभुमीवर शासनाकडून गरजूंना स्वस्त दरात धान्य उपलब्ध करून देण्यात येत आहे. परंतु काही स्वस्त धान्य दुकानदारांकडून काळाबाजार करण्यात येत आहे. अशा दुकानदारांच्या विरोधात अन्न पुरवठा विभागाने कारवाईचा बडगा उगारला असून तीन दुकानांचे परवाने रद्द केले आहेत.

अवश्य वाचा - लॉकडाउनमध्ये कबुतरने लावले भांडण आणि निघाले हे...

नागपुरात कोरोनाचे रुग्ण आहेत. शेकडो लोकांना क्‍वारंटाईन करण्यात आले आहे. कोरोनावर नियंत्रण मिळविण्यासाठी लॉकडाऊन करण्यात आले असल्यामुळे गरिबांची अडचण होत आहे. केवळ जीवनावश्‍यक वस्तुंची दुकानेच उघडी ठेवली जात आहेत.परिणामी, हातावर पोट असणाऱ्यांसमोर उदरनिर्वाहाचा मोठा प्रश्न निर्माण झाला आहे. त्यामुळे अन्न पुरवठा विभागावर मोठी जबाबदारी आली आहे. जिल्ह्यात लाखावर शिधापत्रिकाधारक आहेत. चालू महिन्यात 97 टक्के ग्रामीण नागरिकांनी रेशनचे धान्य उचलले असून शहरी भागातील 95 टक्के नागरिकांना पुरवठा झाल्याचे सांगण्यात येते. मात्र काही रेशनदुकानदारांकडून याचा फायदा घेत नागरिकांना कमी धान्य देत त्याचा काळाबाजार करण्यात येत आहे. अशा दुकानदारांविरूद्ध कारवाईचा धडाका सुरू करण्यात आला. चिचभवन-गोंडखैरी, सावनेर तालुक्‍यातील सिल्लेवाडा येथील दुकानदारावर गुन्हा दाखल केला. तर कामठी तालुक्‍यातील येरखेडा येथील एका दुकानदाराचा समावेश आहे. या तिन्ही दुकानांचे परवाने रद्द करण्यात आले असून काळाबाजार करणाऱ्यांना सोडण्यात येणार नाही, असा इशारा जिल्हा पुरवठा अधिकारी भास्कर तायडे यांनी दिली.

केशरी कार्ड धारकांना धान्य

अंत्योदय व प्राधान्य गटासोबत केशरी कार्ड धारकांनाही धान्य मिळणार आहे. हे धान्य मे आणि जून या दोन महिन्याचे धान्य मिळणार आहे. चालू महिन्याचे धान्य वितरण जवळपास आटोपले असून मे महिन्याचे धान्य दुकानांमध्ये पोहोचले आहे. येत्या सोमवारपासून वाटप सुरू होणार असल्याची माहिती जिल्हा पुरवठा अधिकारी भाष्कर तायडे यांनी दिली.