नागपूर : शहरातील कचरा संकलनासाठी नियुक्ती एजी एन्व्हायरो व बीव्हीजी या दोन्ही कंपन्यांकडून घराघरांतून कचरा संकलन करताना ओला व सुका कचरा एकत्रच घेण्यात येत असल्याचे स्पष्ट झाले. त्यामुळे महापौर दयाशंकर तिवारी यांनी या दोन्ही कंपन्यांच्या कार्यप्रणालीचा अहवाल सोमवारपर्यंत सादर करण्याचे निर्देश प्रशासनाला दिले. 

हेही वाचा - मातृत्व अनुभवण्यापूर्वीच झाला बाळाचा मृत्यू, महिलेचं कृत्य पाहून उपस्थितांचेही पाणावले डोळे

स्वच्छ सर्वेक्षण २०२१मध्ये नागपूर शहराचे रँकिंग वाढविण्याच्या दृष्टीने चर्चा करण्यासाठी महापौरांनी शुक्रवारी (ता.५) विशेष बैठक बोलाविली. मनपा मुख्यालयातील डॉ.पंजाबराव देशमुख स्मृती स्थायी समिती सभागृहात झालेल्या बैठकीत महापौर दयाशंकर तिवारी, ज्येष्ठ नगरसेवक तथा आमदार प्रवीण दटके, उपमहापौर मनीषा धावडे, स्थायी समिती सभापती विजय (पिंटू) झलके, आरोग्य समिती सभापती वीरेंद्र कुकरेजा, विधी समिती सभापती अ‌ॅड.धर्मपाल मेश्राम, अतिरिक्त आयुक्त संजय निपाणे, उपायुक्त घनकचरा व्यवस्थापन डॉ.प्रदीप दासरवार, सहायक आयुक्त सर्वश्री प्रकाश वराडे, हरीश राऊत, अशोक पाटील, गणेश राठोड, विजय हुमने, सहायक आयुक्त किरण बगडे, सुषमा मांडगे यांच्यासह सर्व झोनचे झोनल अधिकारी व दोन्ही कंपन्यांचे प्रतिनिधी उपस्थित होते. घराघरातून ओला व सुका कचऱ्याचे योग्य विलगीकरण होत नसल्याचे आढळून आले. अनेक झोनमध्ये ३० ते ४० टक्केच कचरा वेगळा करण्यात येते. ओला व सुका कचरा वेगवेगळा संकलित न करता मिश्रित कचरा डम्पिंग यार्डमध्ये पाठविल्यास दंडाची तरतूद करारनाम्यामध्ये आहे. त्यानुसार कोट्यवधींचा दंड दोन्ही कंपन्यांवर बसू शकतो. याशिवाय घरोघरून कचरा संकलित करताना एका गाडीवर चालकासह दोन सफाई कर्मचारी असणे करारामध्ये नमूद आहे. मात्र प्रत्यक्षात एका गाडीवर एक कर्मचारी व एक चालकच असतो. एकूणच दोन्ही कंपन्यांच्या निष्काळजीपणाबद्दलही महापौर दयाशंकर तिवारी यांनी नाराजी व्यक्त केली. 

हेही वाचा - आता प्रदेशाध्यक्षपदही विदर्भालाच, काँग्रेसचा 'हात' विदर्भाच्याच डोक्यावर का...

मनपात कचरा गाडी - 
नागरिकांच्या कचरा संकलनाबाबत येणाऱ्या तक्रारी लक्षात घेता तसेच ओला व सुका कचरा संकलित होत नसल्याचे निदर्शनास येताच महापौरांनी मनपामध्ये कचरा संकलन झालेली गाडी बोलाविली. ओला व सुका कचरा वेगळा संकलित होत असला तरी गाडीमध्ये तो विभाजित करण्यासाठी केवळ कापडी पडदा आढळून आले.