नागपूर : दिवाळीनिमित्त अनेक जण आपापल्या शहरात किंवा गावी जातात. परंतु, सुटी एंजॉय करताना सोशल मीडियावर फोटो टाकण्याचा मोह त्यांना आवरता येत नाही. त्याच संधीचा गैरफायदा चोरटे घेऊन बंद घर बघून चोरटे घरफोडी करून मुद्देमाल लंपास करतात, त्यामुळे सजग राहण्याचे आवाहन पोलिसांनी केले.

दिवाळी सणानिमित्त अनेक जण आपापल्या गावी निघून जातात. तसेच मुलांना सुट्या असल्यामुळे काही दिवस मुक्काम करतात. सुटीचा आनंद साजरा करताना सोशल मीडियावर सतत फोटो अपलोड करतात. त्यामुळे घरफोडी करणारे या संधीचा फायदा घेऊन बंद घरे शोधतात. रात्रीच्या सुमारास घरफोडी करून घरातील महागड्या वस्तू, सोने-चांदीचे दागिने चोरून नेतात. अशा अनेक घटना गेल्या काही दिवाळीच्या दरम्यान उघडकीस आल्या आहेत. त्यामुळे पोलिसांनीही यावेळी दिवाळीदरम्याम गस्त वाढविण्याचा निर्णय घेतला आहे.

यासोबतच नागरिकांनाही सतर्क राहण्याचे आवाहन पोलिसांनी केले आहे. गावी जाताना शेजाऱ्यांना घराकडे लक्ष ठेवण्यास सांगावे. तसेच नातेवाईक असल्यास त्यांना गावी जात असल्याची माहिती द्यावी. गावी जात असताना महागड्या वस्तू आणि सोन्याचे दागिने शक्यतो घरी ठेवू नये. यासोबतच नजीकच्या पोलिस ठाण्यातही सूचना द्यावी, जेणेकरून पोलिसांची गस्त व्यवस्थित ठेवतील.

फेसबुकवर फोटो अपलोड करू नये. त्यामुळे आपले लोकेशन समोर येत असल्यामुळे कुणी समाजकंटकही अशा गोष्टीचा फायदा घेऊ शकतात. सध्या शहरात क्युआर कोड सिस्टम लागू करण्यात आली असून गस्तप्रणाली व्यवस्थित सुरू आहे. पोलिस कर्मचारी रात्रीच्या सुमारास हमखास रस्त्यावर दिसतील. त्यामुळे चोरट्यांची घरफोडी करण्याची हिम्मत होणार नाही. परंतु, नागरिकांनी स्वतः सजग राहावे, असे आवाहन पोलिसांनी केले आहे.