गुमगाव (जि. नागपूर) : यंदा बोंडअळी आणि अवकाळी पावसामुळे गुमगाव परिसरातील कोरडवाहू कपाशी व तुरीचे पीक आधीच हातचे गेल्यानंतर गहू आणि तुरीने अपेक्षेप्रमाणे साथ दिली नाही. हे संकट कायम असतानाच परिसरात चाऱ्याअभावी जनावरांची मोठ्या प्रमाणात उपासमार होत आहे. त्यामुळे पशुपालन कसे करायचे, असा प्रश्न शेतकऱ्यांसमोर उभा ठाकला आहे.
हिंगणा तालुक्यातील गुमगाव, लाडगाव, वागधरा, धानोली, वडगाव-गुजर, कोतेवाडा, सुमठाणा, कान्होली, गोधनी, जामठा, दाताळा, शिवमडका या शिवारातील हजारो एकर शेती विविध प्रकल्पाच्या नावाने शेतकऱ्यांच्या हातातून गेली. शेतीच्या जागेवर मोठ्या प्रमाणात झालेली वृक्षतोड, सगळीकडे जमिनीचे झालेले सपाटीकरण, सिमेंटीकरण आणि डांबरीकरणाच्या कामाने वेग घेतला.
हिरवाई जाऊन सगळीकडे सिमेंटची जंगले उभे होत आहेत. साहजिकच शेतीअभावी पर्यायाने मातीअभावी चाऱ्यांचा प्रश्न निर्माण झाला आहे. चारा उपलब्ध नसल्यामुळे जनावरांना मोजक्याच चाऱ्यावर समाधान मानावे लागत आहे.
नशिबी पालापाचोळाच
मागील काही वर्षांपासून जनावरांना मूठभर चारा टाकून शेतकऱ्याला जनावरांची भूक भागवावी लागत आहे. गेल्या काही वर्षात दुष्काळाने आणि नापिकीने हैराण झालेल्या शेतकऱ्यांना या पिकांचा उत्पादन खर्चसुद्धा निघाला नसताना आता पशुपालन करायचे कसे, अशी चिंता भेडसावत आहे. जनावरांना मात्र मिळेल तो पालापाचोळा खाऊन कसेबसे पोट भरावे लागत आहे.
संपादन - अथर्व महांकाळ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.