नागपूर : शासकीय दंत महाविद्यालय व रुग्णालयात प्रत्येक विभागात सावळा गोंधळ आहे. नुकतेच एका विभागात विद्यार्थी रुग्णांकडून पैसे घेत अर्थकारण करीत असल्याचे प्रकरण उजेडात आले. येथील एक्‍स रे काढताना "सीडी' ची मागणी केली जात असल्याचे प्रकरणही उघडकीस आले. आता पुन्हा एक धक्कादायक बाब पुढे आली असून मागील पाच वर्षांपुर्वी दंत महाविद्यालयात लावण्यात आलेली "लिफ्ट' एकदाही वापरण्यात आली नाही. विशेष असे की, सामान ठेवण्यासाठी "लिफ्ट' चा गोदाम म्हणून वापर होत आहे.

अवश्य वाचा - पोलिसांनी असा रचला सापळा, आणि टाकली धाड

दंत महाविद्यालय व रुग्णालयात विद्यार्थी, रुग्ण तसेच इतरांसाठी सोयी सुविधा उपलब्ध करून देण्यासाठी शासनाचा पैसा वापरला जातो. निवृत्त अधिष्ठाता डॉ. विनय हजारे यांच्या कारकिर्दीत दहा ते पंधरा लाख खर्च करून "लिफ्ट' बसवण्यात आली. मात्र ही लिफ्ट कधीच सुरू झाली नाही. विशेष असे की, डॉ. हजारे अधिष्ठाता पदावरून निवृत्त झाले. यानंतर डॉ. सिंधू गणवीर यांच्याकडे अधिष्ठाता पदाचा कार्यभार आला. डॉ. गणवीर यादेखील निवृत्त झाल्या. आता डॉ. मंगेश फडनाईक प्रभारी अधिष्ठाता पदाचा कार्यभार सांभाळत आहे. मात्र ही लिफ्ट सुरू झालेली नसून अक्षरश: धूळ खात पडली आहे. डॉ. विनय हजारे दंतचे अधिष्ठाता असताना त्यांनी या लिफ्टचा प्रस्ताव मांडला होता. त्यानंतर डॉ. सिंधू गणवीर यांच्या कार्यकाळात ही लिफ्ट बसविण्याचे काम सूरू झाले. लिफ्ट बसवून झाली. तिचे ट्रायल झाले. लिफ्ट बसविलेल्या कंत्राटदाराने लिफ्ट सुरू करण्यासाठी ना हरकत प्रमाणपत्र दिले व कामाचे बिल सादर केले. त्याचे बिल अदा झाले. मात्र ती लिफ्ट अडगळीत पडून आहे. नको असलेली लोखंडी कपाटे या लिफ्टच्या दाराजवळ पडलेली आहेत.

जबाबदार कोण?

लिफ्ट बसवण्याचे काम सार्वजनिक बांधकाम विभागाकडून झाले की, इतर कंत्राटदारांकडून झाले, याबाबत माहिती मिळाली नाही. किमान विद्यमान अधिष्ठाता डॉ. मंगेश फडनाईक यांना लिफ्ट सुरू करून सेवेत दाखल करण्याची सुचकता अद्यापही दाखविता आली नाही. यामुळे ही लिफ्ट सूरू करण्यासाठी वैद्यकीय शिक्षण व संशोधन विभागाकडून कोणता "कागदी घोडा' नाचविणार असा सवाल उपस्थित होत आहे. या प्रकरणाला जबाबदार कोण याचा शोध घेऊन त्या अधिकाऱ्यांकडून पैसा वसुल करण्यात यावा, अशी मागणी इंटकचे त्रिशरण सहारे यांनी केली आहे.