नागपूर : फेसबुक फ्रेंडने प्रेमाच्या जाळ्यात अडकवून अभियंता युवतीचे सुमारे सहा महिने लैंगिक शोषण केले. यादरम्यान गर्भधारणा झाली असता बळजबरीने गर्भपात करवून घेतला. याप्रकरणी पीडितेच्या तक्रारीवरून मानकापूर पोलिसांनी आरोपीविरुद्ध गुन्हा दाखल केला आहे. सौरभ अंबादे (२६) असे आरोपीचे नाव आहे.

मूळचा वर्धा जिल्ह्यातील पुलगाव येथील राहणारा असलेला आरोपी सध्या गोधनी बसस्थानकाजवळ राहतो. २३ वर्षीय पीडितसुद्धा वर्धा जिल्ह्यातील रहिवासी आहे. अभियांत्रिकीचे शिक्षण झाल्यानंतर तिने स्पर्धा परीक्षेची तयारी सुरू केली असून, त्यासाठी नागपुरात राहते. जुलै २०२० मध्ये आरोपीने पीडितेला फ्रेंड रिक्वेस्ट पाठविली. तिने सहजतेने ती स्वीकार केली. हळुहळू दोघांमध्ये चॅटिंग सुरू झाले. अल्पावधीतच मोबाईल क्रमांकाचे आदान-प्रदानही आणि बोलणेही सुरू झाले.

अधिक वाचा - कोरोनामुळे अख्ख कुटुंब हादरलं, दोन तासाच्या अंतराने घेतला बाप-लेकाचा बळी

मानकापुरातील फ्लॅटवर झालेल्या एका भेटीदरम्यान लग्नाचे आमिष दाखवत त्याने लैंगिक शोषण केले. सततच्या संबंधांमुळे पीडितेला दिवस गेले. आरोपीने दबाव टाकत गर्भपात करून घेण्यास बाध्य केले. फेब्रुवारी २०२१ नंतर त्यांच्यात बेबनाव निर्माण झाला. आरोपीने तिला टाळणे सुरू केले. आपला फक्त वापर करून घेण्यात आल्याचे लक्षात येताच पीडितेने मानकापूर ठाणे गाठून कैफियत मांडली. त्याआधारे पोलिसांनी गुन्हा दाखल करीत प्रकरणाचा तपास सुरू केला आहे.