नागपूर : ग्रामीण भागाप्रमाणे शहरी भागात शालेय पोषण आहाराचे वाटप करण्यात येत आहे. यासाठी शाळेतील विद्यार्थ्यांना बोलावून त्यांच्या जीव धोक्यात घालण्याचे काम शाळांकडून करण्यात येत आहे.
शाळांना सर्वोच्च न्यायालयाने दिलेल्या निर्देशानुसार सुटयादरम्यान गरजू विद्यार्थ्यांना शालेय पोषण आहाराचे वाटप करायचे आहे. शिक्षणाधिकाऱ्यांकडून तसे आदेश शाळांना आहेत. आतापर्यंत ग्रामीण भागात शालेय पोषण आहार वाटप सुरू होते. आता शहरी भागातील शाळांमध्ये पोषण आहार वाटप करण्यात येत आहे. मात्र, या ठिकाणी विद्यार्थ्यांना एकाच वेळी बोलावून घेतल्याने गर्दी होते आहे. दोन दिवसांपूर्वी अशाच प्रकारे नागसेन विद्यालयात पोषण आहार घेण्यास गर्दी झाली होती. यादरम्यान सोशल डिस्टंसिंग पाळण्यात येत नसल्यामुळे आरटीई ऍक्शन समितीचे अध्यक्ष शाहिद शरीफ यांनी पोलिस आयुक्त आणि जरीपटका पोलिसांकडे तक्रार दाखल केली होती.  यानंतरही बऱ्याच शाळा विद्यार्थ्यांना पोषण आहारासाठी बोलावित आहेत. त्यामुळे विद्यार्थ्यांचे जीव धोक्यात येण्याची शक्यता आहे. यापूर्वीच शहरातील विविध भागात कोरोना विषाणूच्या संक्रमणाचा धोका वाढतो आहे. अशा परिस्थितीत विद्यार्थ्यांना बोलाविणे कितपत योग्य आहे हे कळायला मार्ग नाही.
सविस्तर वाचा - दारूला शोधला हा पर्याय; दारुड्यांची नवी शक्कल
पालकांना बोलावणे योग्य
पोषण आहाराचे वाटप करायचे असल्यास विद्यार्थ्यांऐवजी त्यांच्या पालकांना बोलवावे अशी मागणी आरटीई ऍक्शन समितीचे अध्यक्ष शाहिद शरीफ यांनी केली आहे.