नागपूर - कोळसा खाणीतून चांगल्या दर्जाच्या कोळशाची उचल करून दुय्यम दर्जाचा कोळासा पुरवठा करणाऱ्यांच्या विरोधात महानिर्मितीच्या कोराडी औष्णिक विद्युत केंद्राच्यावतीने कोराडी पोलीस ठाण्यात अफरातफरची तक्रार नोंदवली आहे. यामुळे कोराडी वीज केंद्राचे सुमारे ८० हजाराचे नुकसान झाले आहे तसेच शासनाची फसवणूक करण्यात आल्याचे महानिर्मितीने तक्रारीत म्हटले आहे.

२८ सप्टेंबरला रात्री सुमारे एक वाजच्या सुमारास कोराडी वीज केंद्रात वेकोलीच्या गोंडेगाव कोळसा खाणीतून कोळसा घेवून संबंधित वाहतूक कंत्राटदाराचे वाहन क्रमांक एम.एच.२२- ए.ए.-३४१४ आले. या गाडीच्या नंबर प्लेटवर दुसऱ्या गाडीचे स्टीकर लावण्यात आले असल्याचे सुरक्षा रक्षकास आढळून आले. त्यानुसार तातडीने सदर वाहनाची तपासणी करण्यात आली.

प्रशासनाने सखोल चौकशी केली असता वाहन क्रमांक एम.एच.२२- ए.ए.-३४१४ हे भानेगाव टी पॉइंट येथे कोळसा भरून उभे होते. त्याऐवजी दुसरेचे वाहन कोराडीत पाठवण्यात आले. खापरखेडा पोलिसांनी वाहनचालक, कंत्राटदार पर्यवेक्षक ठाण्यात आणले. त्यात त्यांनी कोळशाचे वाहन बदलल्याची कबुली दिली.

मेसर्स बी.एम.एच. या कंपनीस कोराडी वीज केंद्रातर्फे कोळसा वाहतुकीवर जी.पी.एस. आर.एफ.आय.डी.द्वारे नियंत्रण व पाळत ठेवण्याचे कंत्राट दिले आहे. सदर वाहनामध्ये आर.एफ.आय.डी. घटनास्थळी लागलेले नव्हते. त्यामुळे बी.एम.एच. कंपनीच्या कर्मचाऱ्याची भूमिका संशयास्पद असून कंपनी मालक व सुपरवायझर यांचीही चौकशी केली जात आहे.

कोराडी पोलिसांनी वाहतूक कंत्राटदार मालक, गाडी मालक, वाहनचालक, बी.एम.एच. कंपनी कर्मचारी यांची चौकशी करून गुन्हा नोंदविण्याबाबत अर्ज दिला आहे. तसेच कोराडी वीज केंद्राच्या संबंधित कर्मचाऱ्यांना कारणे दाखवा नोटीस बजावला आहे.