नागपूर : भाजप नेते किरीट सोमय्या (Kirit Somaiya) यांनी केलेला आरोप बिनबुडाचा असल्याचा दावा करीत लोंढे यांनी त्यांच्याविरुद्ध मानहानीचा दावा केला होता. यात मानहानीची सांकेतिक रक्कम ही १ रुपया इतकी ठेवण्यात आली होती. तसेच सोमय्यांविरुद्ध फौजदारी कारवाईसुद्धा व्हावी, अशी मागणी लोंढे यांनी केली होती. प्रथम श्रेणी न्याय दंडाधिकाऱ्यांनी लोंढे यांची ही तक्रार फेटाळली.(Complaint Rejected Against Kirit Somaiya)

लोंढेंनी त्याचे वकील सतीश उके यांच्यामार्फत सोमय्या यांच्याविरुद्ध दिवाणी आणि फौजदारी अशा दोन याचिका दाखल केल्या आहेत. या प्रकरणी प्रथमश्रेणी न्यायदंडाधिकारी सुषमा गवळी यांच्या समक्ष सुनावणी झाली. दाखल केलेल्या या याचिकांनुसार, सतत खोट्या आरोपांची राळ उडवून महाविकास आघाडीच्या नेत्यांना बदनाम करण्याचे काम सोमय्या करीत आहेत. टीका करताना त्यांचा तोल ढळतो. यामुळे काँग्रेस पक्षाची नाहक बदनामी होत आहे. स्वतःच तपास अधिकारी व स्वतःच न्यायाधीश असल्याच्या आविर्भावात ते बोलतात. मात्र, त्यांच्याकडे कोणतेही पुरावे नाहीत. त्यामुळे काँग्रेसची बदनामी केल्याने त्याच्यावर फौजदारी कारवाई करण्यात यावी तसेच मानहानी केल्यामुळे १ रुपयाचा दंड ठोठावण्यात यावा, अशी मागणी या याचिकेद्वारे करण्यात आली आहे.(Kirit Somaiya News Updates)

यातील फौजदारी तक्रार फेटाळून लावण्यात आली आहे. या तक्रारीतील आरोप निश्चित स्वरूपाचे नाहीत. त्यात स्पष्टता नाही. सोमय्यांच्या वक्तव्यात कुणा एका व्यक्तीविरुद्ध आरोप झालेले नसल्याने त्यामुळे कोणाची बदनामी होणे, जाणीवपूर्वक अपमान होणे किंवा कोणाला धमकी देणे हे घटक नाहीत. त्यामुळे त्यांच्याविरुद्ध भादंविच्या कलम ४९९, ५०३, ५०४ व ५०५ (i) नुसार कारवाई होऊ शकत नाही, असे सांगत न्यायालयाने ही तक्रार फेटाळली.