नागपूर : वंचित बहुजन आघाडीने महाविकास आघाडीसोबत राहावे अशी आमची इच्छा आहे. याबाबत अनेक चर्चा झाल्या आणि अजून सुरू आहेत. उमेदवारी अर्ज माघारी घेण्याच्या शेवटच्या दिवसांपर्यंत आमची दारे खुली राहणार असल्याचे काँग्रेसचे राष्ट्रीय महासचिव व खासदार मुकुल वासनिक यांनी सांगितले.

अकोला लोकसभा मतदारसंघातील काँग्रेसच्या उमेदवाराने अर्ज मागे घ्यावा, अशी मागणी वंचित आघाडीची आहे. येथून वंचितचे नेते प्रकाश आंबेडकर निवडणूक लढत आहे. काँग्रेसने अभय पाटील यांना उमेदवारी जाहीर केली आहे. यावरून काँग्रेस आणि वंचितमध्ये मोठा वाद सुरू आहे. वंचितचे नेते प्रकाश आंबडेकर आणि काँग्रेसचे प्रदेशाध्यक्ष नाना पटोले यांनी एकमेकांना भाजपचे हस्तक म्हटले आहे.

त्यामुळे वाद विकोपाला जाण्याची शक्यता वर्तविली जात आहे. वंचितने पाठिंबा दिलेल्या उमेदवारांचा प्रचार थांबविण्याचे निर्देश दिले आहे. यासंदर्भात मुकुल वासनिक यांचे वक्तव्य आघाडीसाठी आशादायी मानले जाते. अकोला येथून काँग्रेस त्यांचा उमेदवार मागे घेऊ शकते, अशी शक्यता वर्तविली जात आहे.

भाजप आणि शिवसेना - राष्ट्रवादी यांच्यात अद्याप १० जागांवर समझोता झालेला नाही. मात्र तुम्ही काँग्रेसचेच विचारता. सांगलीचा निर्णय लवकरच निकाली निघेल. आमची चांगली चर्चा सुरू आहे. कोणाला चिंता करण्याची गरज नाही, असेही मुकुल वासनिक म्हणाले.