नागपूर : चंद्रपूर जिल्ह्यात सिलिंडरचा स्फोट झाल्याची घटना ताजी असताना नागपूर जिल्ह्यातील चितारओळी परिसरातील दोन मजली इमारतीत शनिवारी पहाटेच्या सुमारास स्फोट झाला. या स्फोटात तीन जण गंभीर जखमी तर एकजण किरकोळ जखमी झाला. स्फोटाची तीव्रता इतकी होती की, परिसर हादरले.

प्राप्त माहितीनुसार, मूर्तिकारांची गल्ली म्हणून नागपुरातील चितारओळी परिसर ओळखला जातो. शुक्रवारी रात्री येथील दोन मजली इमारतीत राहणारे बिंड कुटुंबीय झांत झोपले होते. पहाटे ५.३० वाजताच्या सुमारास अचानक सिलिंडरचा स्फोट झाला. हा स्फोट इतका भीषण होता की परिसरातील काही घरांना हादरा बसला.

ज्यावेळी स्फोट झाला त्यावेळी बिंड कुटुंबीय शांत झोपले होते. स्फोटात गजानन बिंड (६०), पत्नी ऊर्मीला बिंड (५५), सून आरती वामन बिंड (२९) हे गंभीर झाले असून, त्यांना उपचारासाठी खाजगी रुग्णालयात दाखल करण्यात आले आहे. तर नातू संकेत रवींद्र वानखेडे हा किरकोळ जखमी झाला. त्याच्यावर घरीच उपचार सुरू आहे. सिलिंडरच्या लीकेजमुळे स्फोट झाल्याचं सांगितले जात आहे.

भिंत कोसळली

स्फोटाची तीव्रता इतकी होती की आवाज ऐकून परिसर हादरले. स्फोटामुळे इमारतीची तळमजल्यावरील एका बाजूची भिंत कोसळली. तसेच भिंतीवरील लोखंडी ग्रीलही तुटून बाहेर पडल्या. घटनेची माहिती मिळताच अग्निशमन दलाच्या गाड्या घटनास्थळी दाखल झाल्या.