नागपूर : राज्याचे मुख्यमंत्री, उपमुख्यमंत्री कोण, असा प्रश्‍न विचारला तर उद्धव ठाकरे आणि अजित पवार, असे उत्तर मिळेल. पण, राज्याचे माहिती व जनसंपर्क महासंचालनालयाला विचारले म्हणजे त्यांची वेबसाईट पाहिली तर वेगळेच उत्तर मिळेल. या वेबसाईटनुसार, राज्यात महाविकास आघाडीचे सरकार असताना मुख्यमंत्री देवेंद्र फडणवीस असून, महसूलमंत्री चंद्रकांतदादा पाटीत तर वित्तमंत्री सुधीर मुनगंटीवर आहेत. लोकांना योग्य माहिती आणि सूचना देण्याचे सांगणारा माहिती व जनसंपर्क विभागच चुकीची माहिती देत आहे. 

बाहेरील व्यक्तींना राज्याची माहिती व्हावी, प्रशासनाची माहिती कळावी, या उद्देशातून प्रत्येक विभागाचे संकेतस्थळ (वेबसाईट) तयार करण्याचे आदेश शासनाकडून देण्यात आले. त्यानुसार प्रत्येक विभागाने आपले संकेतस्थळ तयार केले आहे. या संकेतस्थळावर लोकहिताची प्रशासनाच्या दृष्टिकोनातून विशेष करून अधिकाऱ्यांची माहिती अपडेट असणे आवश्‍यक आहे. तशा सूचना शासनाच्या आहेत. वरिष्ठ अधिकाऱ्यांकडूनही कनिष्ठ अधिकाऱ्यांना "ऑनलाइन आणि अपडेट' राहण्याचा सल्ला देण्यात येतो. परंतु, माहिती व जनसंपर्क महासंचालनालय कार्यालयच "आउटडेटेड' आहे. राज्यात मागील वर्षी नाव्हेंबर महिन्यात शिवसेना, कॉंग्रेस आणि राष्ट्रवादीचे महाविकास आघाडी सरकार सत्तेत आले.

- बोंबला! नागपूरच्या मेयो रुग्णालयातून चार कोरोना संशयितांचा पोबारा

पाटील महसूल तर मुनगंटीवार वित्त मंत्री
मुख्यमंत्री उद्धव ठाकरे झाले. प्रथम सहा सदस्यांनी मंत्रिपदाची शपथ घेतली. त्यानंतर मंत्रिमंडळाचा विस्तार झाला. राज्यमंत्र्यांचीही नियुक्ती करण्यात आली असून, खातेवाटपही झाले. आतापर्यंत तीन अधिवेशने झाली. सरकारचा कारभार पुढे गेला. माहिती व जनसंपर्क महासंचालनालय मात्र तिथेच असल्याचे दिसते. महासंचालनालच्या संकेतस्थळावर आजही भाजप-सेनेचे सरकार असून मंत्रिमंडळही तेच आहे. महाविकास आघाडी सरकार लवकरच कोसळेल, असा दावा अनेकांकडून करण्यात आला. माहिती व जनसंपर्क महासंचालनालयालाही असेच वाटत असावे, असेच दिसते.