नागपूर : काही दिवसांपासून ड्रग्ज तस्कर आणि गांजा तस्करांची शहरात धूम होती. त्यामुळे युवा पिढी अंमली पदार्थांच्या अमलाखाली आली होती. पब, बार, पानठेले आणि नाईट पार्ट्यांमध्ये बिनधास्त ड्रग्सची विक्री होत होती. ड्रग्ज तस्करीबाबत ‘सकाळ’ने वृत्त प्रकाशित करताच पोलिस आयुक्तांनी गांभीर्याने दखल घेतली. एकाच वेळी शहरात ड्रग्ज आणि गांजा तस्करावर छापे घालण्यात आले. ११ जणांना ताब्यात घेण्यात आले तर काहींकडून अंमली पदार्थ जप्त करण्यात आले.

पोलिस आयुक्त अमितेश कुमार, पोलिस सहआयुक्त अस्वती दोरजे, गुन्हे शाखेचे अतिरिक्त पोलिस आयुक्त सुनील फुलारी यांच्या मार्गदर्शनाखाली गुन्हे शाखेचे नवनियुक्त पोलिस उपायुक्त चिन्मय पंडित यांच्या नेतृत्वात अमली पदार्थ विरोधी पथकाच्या पाच टीमसह सर्वच पोलिस स्टेशनच्या अधिकाऱ्यांनी एकाच वेळी शहरात धाडी टाकल्या. पोलिसांनी एकूण ५१ गुन्हे दाखल केले. यातील पाच गुन्हे अमली पदार्थ विक्रीचे आहेत.

पोलिसांनी तस्करांसह ६६ जणांना अटक करून एक लाख ११ हजार रुपये किमतीचे अमली पदार्थ जप्त केले. अटकेतील आरोपींमध्ये अमली पदार्थांचे सेवन करणाऱ्यांचाही समावेश आहे. अमली पदार्थ तस्करांचे जाळे नष्ट करण्यासाठी पोलिसांकडून यानंतरही अशाच प्रकारची मोहीम राबविण्यात येणार आहे. अमली पदार्थ तस्करांबाबत माहिती असणाऱ्या नागरिकांनी गुन्हेशाखेच्या अमली पदार्थ विरोधी पथकाच्या पोलिस निरीक्षकांच्या ९४२२९४२१०० या मोबाईल क्रमांकावर संपर्क साधावा, असे आवाहन गुन्हेशाखा पोलिसांनी केले आहे.

पोलिसांनी मानकापूरमधील ताजनगर येथे छापा टाकून जैनुल अब्दुल मुर्तजा अन्सारी, महालमधील चितोर ओळ परिसरातून मोहम्मद अब्दुल ऊर्फ गोलू अब्दुल अजीज, मामा ऊर्फ इस्माइल शेख जब्बार, बजेरियातील मुकेश ऊर्फ पापा तिवारी, गड्डीगोदामधील अभिषेक गौर व जगनाडे चौकातून कली या अमली पदार्थ तस्करांना गजाआड केले.