नागपूर : ठगबाजांसह सायबर गुन्हेगारांकडून फसवणुकीसाठी अवलंबिले जाणारे विविध फंडे उजेडात येत आहेत. पण, एका अभियंत्याने चक्क रेल्वेचेच हुबेहुब तिकीट तयार केले. तेच वापरून त्याचा प्रवासही सुरू होता. परंतु, कर्तव्यदक्ष तिकीट निरीक्षकाने त्याचे बिंग फोडले. याप्रकरणी लोहमार्ग पोलिसांनी अभियंत्याविरुद्ध गुन्हा दाखल केला आहे. वशिष्ठ महर्षी (२६) असे आरोपी अभियंत्याचे नाव आहे.

प्राप्त माहितीनुसार, वशिष्ठ महर्षी याने १२६९२ दिल्ली-बेंगळुरू राजधानी एक्स्प्रेसचे भोपाळ ते सिकंदराबाद प्रवासाचे हुबेहुब तिकीट मोबाईलवर तयार केले. ते तिकीट आपल्याच दुसऱ्या मोबाईलमध्ये पाठवले. त्याच तिकिटाच्या मदतीने तो भोपाळहून राजधानीच्या बी-१० बोगीत चढला. मागोमाग तिकीट तपासणीस नवीनकुमार कुमावतही बोगीत आले आणि प्रावाशांकडील तिकिटांची तपासणी सुरू केली.

जाणून घ्या - पुनर्वसन मंत्री विजय वडेट्टीवारांनी उपमुख्यमंत्र्यालाच फटाकारले!

वशिष्ठला तिकीट विचारले असता त्याने मोबाईलवरील तिकीट दाखविले. या तिकीटेवर कोच बी-१० आणि बर्थ २० असे नमुद होते. विशेष म्हणजे या बोगीतील २० नंबरची बर्थ रिकामीच होती. शंका आल्याने कुमावत यांनी रेल्वेचा चार्ट तपासला. मात्र, मोबाईलवरील तिकिटावर उल्लेखीत पीएनआर नव्हता. यामुळे वरिष्ठांना प्रकरणाची माहिती दिली.

गाडी नागपुरात आली असता विशिष्ठला उतरवून आरपीएफच्या ताब्यात देण्यात आले. प्रकरणाचे गांभीर्य लक्षात घेत प्राथमिक चौकशीनंतर हे प्रकरण लोहमार्ग पोलिसांकडे वर्ग करण्यात आले. पोलिसांनी विश्वासघातचा गुन्हा दाखल केला आहे. या प्रकरणाचा तपास करणारे पोलिस उपनिरीक्षक विजय तायवाडे यांनी गुरुवारी तिकीट तपासनीस नवीन कुमार कुमावत आणि प्रमोद कुमार शॉ याचे बयान नोंदविले.