नागपूर : पाच वर्षांपूर्वी नागपूरकरांपर्यंत पोहोचण्यासाठी सुरू करण्यात आलेले महामेट्रोचे फेसबुक पेज आज साडेपाच लाख नागरिकांच्या पसंतीस उतरले आहे. दर आठवड्यात तीन लाख नागरिक या पेजला भेट देत असून, 70 हजार नागरिक "लाइक्‍स' करीत महामेट्रोच्या विविध उपक्रम, कार्यक्रमांना प्रतिसाद देत आहेत. 
 

अधिक वाचा : काहीबी करा, शेतमालाची खरेदी सुरू करा! 

पहिल्या क्रमांकावरील मेट्रो फेसबुक पेज 
गेल्या पाच वर्षांत महामेट्रोचे फेसबुक पेज अनेकांची सवय झाली आहे. त्यातून चाहत्यांचा आलेख सातत्याने वाढत आहे. प्रत्येक प्रश्नाचे उत्तर या पेजवर मिळत असल्याने झपाट्याने चाहता वर्ग निर्माण झालेले शहरातील हे लोकप्रिय अव्वल फेसबुक पेज आहे. देशभरातील सर्व शासकीय विभागांच्या तुलनेत सर्वांत जास्त "फॉलोअर्स' असलेले पहिल्या क्रमांकावरील मेट्रो फेसबुक पेज ठरले आहे. मेट्रोच्या फेसबुक पेजवर नागरिकांना सतत प्रकल्पाविषयी अद्ययावत माहिती दिली जाते. प्रकल्पाचे बांधकाम, स्थानकांच्या स्थापत्य कलेशी संबंधित माहिती, बाह्य-आंतरिक सज्जा, प्रकल्पाशी संबंधित तांत्रिक माहिती, वापरण्यात येणाऱ्या यंत्रांविषयी माहिती, कार्यादरम्यानची आकर्षक छायाचित्रे या पेजवर शेअर केली जातात. अनेक ऑनलाइन स्पर्धा, विविध उपक्रमदेखील आयोजित केले जातात. येथे नागरिकांनी विचारलेल्या शंकांचे निरसन केले जाते. "लाइक, कमेंट्‌स व शेअर'च्या माध्यमातून एका आठवड्याला तीन लाखांवर नागरिक पेजला भेट देत आहेत. 17 हजार नागरिकांशी संवाद साधला जात आहे. 70 हजार नागरिक आठवडाभऱ्यात कुठल्या तरी स्वरूपात पोस्टवर प्रतिसाद देतात. दर महिन्याला "मेट्रो संवाद'मधून वरिष्ठ अधिकारी नागरिकांशी हितगूज साधत आहेत. 

अधिक वाचा : मोडून पडला संसार, तरी मोडला नाही कणा 

"फेसबुक लाइव्ह'ला उदंड प्रतिसाद 
नागरिकांच्या फायद्याचे असणारे काही माहितीपूर्ण कार्यक्रम "फेसबुक लाइव्ह' स्वरूपात, तर व्यवस्थापकीय संचालक डॉ. ब्रजेश दीक्षित यांच्या नागरिकांसाठी असलेल्या सूचना अनेकदा व्हिडिओ रूपात नागरिकांपर्यंत पोहोचविल्या जातात. मेट्रोच्या वर्धा व हिंगणा मार्गावरील उद्‌घाटन सोहळ्याचा आनंद नागरिकांनी फेसबुक लाइव्हद्वारेही लुटला.