नागपूर : नवीन वर्षाचे स्वागत करण्यासाठी तरुणाई उत्सुक असतानाच पोलिस आयुक्तांनी चार हजार पोलिसांचा ताफा कडक बंदोबस्तासाठी तैनात केला आहे. नाइट कर्फ्यू कायम ठेवण्यात आल्यामुळे ११ वाजेनंतर रस्त्यावर दिसणाऱ्यांची रात्र पोलिस ठाण्यात जाण्याची शक्यता आहे. नववर्षाचे काऊंट डाऊन सुरू झाले आहे. थर्टीफर्स्ट दरम्यान शहरात कोणतीही अनूचित घटना घडू नये यासाठी पोलिसांनी नाकाबंदी करायला सुरुवात केली आहे.

‘थर्टी फर्स्ट’च्या बंदोबस्ताबाबत पोलिस आयुक्त अमितेशकुमार यांनी वरिष्ठ पोलिस अधिकाऱ्यांची बैठक घेऊन बंदोबस्ताची आखणी केली. नववर्षाचे स्वागत शांततेत करणाऱ्या नागरिकांना कोणताही त्रास होणार नाही याकडेही लक्ष देण्याचे निर्देश अमितेशकुमार यांनी दिले आहेत. या दिवशी अपघात होऊ नये याचीही विशेष काळजी घेण्यात येत आहे.

अधिक माहितीसाठी - साहस! कारंजातील दोन दिव्यांग करणार ‘कळसूबाई़’ सर; नव्या वर्षाच्या स्वागतासाठी उपक्रम

शहरातील विविध मॉल्स व गर्दीच्या ठिकाणांवर पोलिसांचे विशेष लक्ष असणार आहे. या ठिकाणी साध्या गणवेशातील पोलिस तैनात करण्यात येतील. फुटाळा तलाव, वेस्ट हायकोर्ट रोडवर पोलिसांचा चोख बंदोबस्त असेल.

चिडीमारी करणाऱ्यांविरुद्ध कठोर कारवाई करण्यासाठी सामाजिक सुरक्षा विभागाचे पथक व संबंधित पोलिस ठाण्यातील महिला सेलचे कर्मचारी तैनात करण्यात येणार आहेत. मॉल्स व गर्दीच्या ठिकाणांची बॉम्ब शोधन नाशक पथकाद्वारे तपासणी करण्यात येणार आहे.

कोविडचे भान ठेवून मास्कचा वापर करा
नववर्षाचे स्वागत कायद्याच्या चौकटीत राहून करा. कोविडचे भान ठेवून मास्कचा वापर करा. रात्री अकरानंतर रस्‍त्यावर येऊ नका. भरधाव वाहने चालवू नका. कुटुंबीयांसह सेलीब्रेशन करा. दुसऱ्यांना त्रास होणार नाही, असे कोणतेही कृत्य करू नये. 
- अमितेश कुमार,
पोलिस आयुक्त

विदर्भातल्या ताज्या बातम्यांसाठी क्लिक करा

असा आहे बंदोबस्त

• बंदोबस्तात तैनात अधिकारी व कर्मचारी - ४,३००
• नाकेबंदी - ७५ ठिकाणी
• फिक्स पॉइंट - १०० 
• जीप पॅट्रोलिंग - १०० 
• बीट मार्शल - १५० 
• गुन्हे शाखा पथक - १२

संपादन - नीलेश डाखोरे