नागपूर : नोकरी लावून देण्याचे आमिष दाखवून लुबाडणारी महाठग प्रीती दास जामीनावर कारागृहाबाहेर येताच पुन्हा पोलिस अधिकारी आणि कर्मचाऱ्यांच्या गराळ्यात वावरायला लागली आहे. क्रांतीज्योती सावित्रीबाई फुले यांच्या जयंतीनिमित्त तिने हुडकेश्वर पोलिस ठाण्यात कार्यक्रमात उपस्थिती लावली. त्यामुळे पुन्हा एकदा प्रीती दासच्या कृत्यांची चर्चा होऊ लागली आहे.

नक्की वाचा - नवनीत राणांनी घेतला उखाणा अन् उपस्थितांच्या तोंडी एकच वाक्य 'वाह वाह क्या बात है!'

प्रीती दासने सिताबर्डीतील एनआयटी कॉप्लेक्‍समध्ये गॅलक्‍सी कन्सलटन्सी सर्व्हिसेस नावाने कंपनी उघडली होती. उच्चशिक्षित तरुणांना मोबाईल करून सरकारी नोकरी मिळवून देण्याचे आमिष दाखवून ती अनेकांना गंडा घालायची. अभियंता नवल राधेश्‍याम पांडे (२८) रा. वर्धा हा मार्च २०१७ मध्ये प्रीतीकडे गेला. तिने त्याला ओसीडब्ल्यू कंपनीत २५ हजार रूपये महिन्याची नोकरी लावून देण्याचे आमिष दाखवून दीड लाख रुपये उकळले. 

तिने त्याला ओसीडब्ल्यूच्या नावाने बनावट नियुक्तीपत्र दिले. तो ओसीडब्ल्यू कंपनीत गेला असता ते बनावट असल्याचे निष्पन्न झाले. तो तिला पैसे परत मागत होता. पण, तिने पैसे परत केले नाही व धमकावत होती. प्रीती दासच्या कृत्याचे बिंग फुटल्यानंतर पांडे याच्या तक्रारीवरून सीताबर्डी पोलिस ठाण्यात गुन्हा दाखल करण्यात आला. त्यापूर्वी पाचपावली पोलिस ठाण्यात एका व्यक्तीला लग्नाचे आमिष दाखवून लुबाडले. नागपूरसह भंडारा येथेही तिच्याविरुद्ध अनेक गुन्हे दाखल आहेत.

अधिक वाचा -  पानिपतावर जिंकण्यासाठी नव्हे तर तत्वासाठी लढले मराठे; पहिल्यांदाच उघड झालीत धारातीर्थी पडलेल्या सरदारांची नावं 

गुन्हे शाखेने तिला विविध गुन्ह्यात अटक केली होती. त्यानंतर तिची रवानगी कारागृहात करण्यात आली. जामीनावर कारागृहाबाहेर येताच पुन्हा तिने पोलिस अधिकारी व कर्मचाऱ्यांना भुरळ घालणे सुरू केले. क्रांतीज्योती सावित्रीबाई फुले यांच्या जयंतीनिमित्त तिने हुडकेश्वर पोलीस ठाण्यात कार्यक्रम घेतले. एका आरोपी महिलेकडून पोलिस ठाण्यात जाऊन पोलिस कर्मचाऱ्यांसोबत कार्यक्रम करणे किती योग्य, असा सवाल यानिमित्त करण्यात येत आहे. पोलिस वर्तुळात पुन्हा प्रीतीच्या कृत्यांची चर्चा झाली आहे, हे विशेष.

संपादन - अथर्व महांकाळ