नागपूर : बॅंकेला सुट्टी आहे आणि एटीएममधून पैसे निघत नाहीत अशी परिस्थिती उद्भवल्यास जवळच्या पोस्ट ऑफिसमधून आपल्या कुठल्याही बॅंक खात्यातील पैसे काढता येतील. टपाल विभागाने सर्वसामान्य ग्राहकांसाठी आधार एटीएम अर्थात एईपीएसची सुविधा देण्यास सुरूवात केली आहे.

अवश्य वाचा - झाली दगडफेक; फुटल्या काचा...घातला गोंधळ...

आधुनिक तंत्रज्ञानाचा वापर करून स्वत:ला केवळ पत्रव्यवहारापुरते सीमित न ठेवता टपाल विभागाने आपले स्वरूप बदलले आहे. भारतीय टपाल विभागाच्या इंडिया पोस्ट पेमेंट्‌स बॅंकेद्वारा ग्राहकांच्या सेवेत आधार संलग्न भुगतान सेवा अर्थात "एईपीएस' सुरू केली आहे. एईपीएसच्या माध्यमातून टपाल विभागाच्या कोणत्याही शाखेतून ग्राहकांना आपल्या बॅंकेच्या खात्यातून पैसे काढता शक्‍य होणार आहे. विशेष म्हणजे, ही सर्व सुविधा कागद विरहीत अर्थात पेपरलेस असून, केवळ बोटांच्या ठश्‍याने म्हणजे "बायोमेट्रिक पद्धतीने' अवघ्या काही मिनिटांत ग्राहकांना आपल्या हातात पैसे मिळणार आहे. अनेकदा बॅंकेत तांत्रिक कारणामुळे संबंधित बॅंकेचे एटीएम कार्य करत नाही. त्यामुळे बॅंकेच्या ग्राहकांना मोठ्या अडचणींचा सामना करावा लागतो. यावेळी या सुविधेचा लाभ ग्राहकांना घेता येईल.

या योजनेंतर्गत नागपूर विभागातील 2 हजार 922 पैकी कोणत्याही टपाल शाखेत संबंधित ग्राहकांने आपल्या बॅंकेचे नाव, आधार क्रमांक सांगायचा असून, आधार लिंक भ्रमणध्वनी क्रमांकावर आलेला ओपीटी देऊन एका वेळ जास्तीत जास्त 10 हजारा पर्यंत रक्कम काढता येणे शक्‍य होणार आहे. विशेष म्हणजे, यात टपाल तसेच बॅंकेकडून कोणत्याही प्रकारचे शुक्‍ल आकारल्या जात नाही. टपाल विभागातील ग्राहकांना बॅंकेची सुविधा घरबसल्या मिळावी या उद्देशाने देशभरात इंडिया पोस्ट पेमेंट्‌स बॅंके ही (आयपीपीबी) सुविधा सुरू केली होती. त्याच्या वर्धापन दिनापासून एईपीएसची सेवा सुरू करण्यात, याला नागपूर विभागात उत्स्फूर्त मिळत आहे. ग्रामीण भागातील नागरिकांसाठी ग्रामीण डाकसेवकाच्या माध्यामातून पैसे काढण्यासाठी ही सुविधा उपलब्ध करून देण्यात आलेली आहे.