नागपूर : शासकीय वैद्यकीय महाविद्यालय व रुग्णालयात (मेडिकल) कोरोनाबाधितांवरील उपचारासाठी नेमक्या किती खाटा आहेत, याचे उत्तर प्रशासनाला माहीत नाही. प्रशासनाने मेडिकलमद्ये ६०० खाटा असून ४०० खाटा प्रस्तावित असल्याचे सांगितले. मात्र, मेडिकलमध्ये कोरोनाबाधित महिलेला दाखल करून घेण्यास चक्क डॉक्टरांनी नकार दिला. मेडिकलच्या ट्रॉमा युनिटमध्ये पोहोचलेल्या ६५ वर्षीय महिलेस बाहेरचा रस्ता दाखवला. अखेर या महिलेला मेयो रुग्णालयाने आधार दिला.

हेही वाचा - ३० वर्षांपूर्वीही ममतांवर झाला होता जीवघेणा हल्ला,...

रात्री १० वाजता या महिलेस मेयो रुग्णालयात दाखल करण्यात आले. जिल्हा शल्यचिकित्सक यांनी दिलेल्या माहितीनुसार, मेडिकलमध्ये २९९ कोरोनाबाधित दाखल आहेत, तर मेयो रुग्णालयात ३१० कोरोनाबाधितांवर उपचार सुरू आहेत. मेडिकलमध्ये ६०० खाटा असल्याचे सांगण्यात येते. यामुळे उर्वरित ३०० खाटा रिकाम्या असताना मेडिकलमध्ये रुग्णांना दाखल करण्यात येत नाही. हा एकप्रकारचा कोरोनाबाधितांच्या जिवाशी खेळ करण्यात येत असल्याची तक्रार रुग्णाच्या नातेवाइकांनी केली आहे. रात्री मेडिकलमध्ये पाच अतिदक्षता विभागांसह इतरही वॉर्ड हाउसफुल्ल झाल्याचे कारण सांगत ट्रॉमा केअर युनिटमध्ये रात्री १० वाजता आलेल्या महिलेस मेयोत जा, असे सांगण्यात आले. 

मेडिकलमधील वैद्यकीय अधीक्षक डॉ. अविनाश गावंडे नव्याने वॉर्ड तयार करण्यासाठी रात्री मेडिकलमध्ये आले. मोबाईलवरून इतर अधिकाऱ्यांशी संपर्क साधून रात्री वॉर्ड तयार केला. त्या महिलेस रात्री दाखल करून घेण्यात येईल, असे सागंण्यात आले. मात्र, ट्रॉमा युनिटमधील डॉक्टरांनी खाटा शिल्लक नसल्याचे सांगून मेयोत पाठवले. यामुळे ती महिला मेयोत गेली. मेयोत तिला दाखल करून घेण्यात आले. 

हेही वाचा - दुकाने बंद, पण 'सुपर स्प्रेडर' रस्त्यावर, पोलिसांची कारवाई धडाक्यात; नागरिकांची मनमर्जी...

मेयोत तोकडे मनुष्यबळ - 
मेयो रुग्णालयात तोकडे मनुष्यबळ आहे. गतवर्षी कोरोनाचा उद्रेक झाल्यानंतर जिल्हाधिकारी यांनी अतिरिक्त पदे मंजूर करीत तेथे परिचारिकांना पाठविण्यात आले होते. मात्र, कोरोनाचा प्रभाव कमी झाल्यानंतर तेथील मनुष्यबळ मूळ ठिकाणी हलवण्यात आले. यामुळे मेयोत आता कोरोनाबाधितांवरील उपचार करण्यासाठी परिचारिकांची संख्या कमी आहे. सध्या ३१० रुग्ण मेयोत दाखल आहेत. येथील १०० रुग्ण अतिदक्षता विभागात आहेत.