नागपूर : महापालिकेच्या आरोग्य विभागाने हंगामी डास उत्पत्ती स्थळे तपासणीससाठी काढलेल्या हंगामी जागांसाठी विज्ञान शाखेतील पदवीधरासह समाजशास्त्रातील पदव्यूत्तरांनीही अर्ज केले आहेत. डास उत्पत्ती स्थळे तपासणीसपदाच्या २५ जागांसाठी एक हजार ७३ अर्ज आले आहेत. या पदांसाठी केवळ दहावी उत्तीर्ण उमेदवाराची गरज होती. यावरून बेरोजगारी किती भीषण रूप धारण करीत आहे हे लक्षात येते.

शहरात वाढलेल्या बेरोजगारीचे चित्र महापालिकेत दिसून आले. महापालिकेच्या आरोग्य विभागाने राष्ट्रीय किटकजन्य रोग नियंत्रण कार्यक्रमाच्या अंमलबजावणीसाठी डासोत्पत्ती स्थाने तपासणीसच्या २५ पदांसाठी जाहिरात काढली होती. या पदासाठी केवळ दहावी उत्तीर्ण उमेदवारांना मुलाखतीसाठी आमंत्रित करण्यात आले होते. विशेष म्हणजे हे पद हंगामी असून, मानधनावर उमेदवारांची नियुक्ती करण्यात येणार आहे.

अधिक वाचा - रेल्वे प्रवासादरम्यान झाला पोलिस कर्मचाऱ्याचा मृत्यू; उत्तरीय तपासणीदरम्यान आढळले कोरोना पॉझिटिव्ह

मात्र, शहरातील बेरोजगारीचे भयानक चित्र यानिमित्त दिसून आले. दहावी पात्रता लागणाऱ्या या पदासाठी विज्ञान आणि समाजशास्त्रातील पदव्युत्तरासह पदवीधरांनीही महापालिकेत मुलाखतीसाठी गर्दी केली होती. या हंगामी २५ पदांसाठी एक हजार १७३ अर्ज आल्याचे महापालिकेतील अधिकाऱ्याने नमुद केले.

महापालिकेच्या आस्थापनेवर डास उत्पत्ती स्थळे तपासणीस हे पद नाही. त्यामुळे डासांची केंद्रे शोधण्यासाठी तूर्तास महापालिकेतील चतुर्थ श्रेणी कर्मचाऱ्यांचा वापर केला जात आहे. परंतु, केंद्र सरकारने राष्ट्रीय किटकजन्य रोग नियंत्रण मोहिम राबविण्यासाठी मानधनावर डास उत्पत्ती स्थळे तपासणीस नियुक्त करण्यास परवानगी दिली आहे. या नियुक्त्या राष्ट्रीय नागरी आरोग्य अभियानांतर्गत करण्यात येत असल्याचे अधिकाऱ्याने स्पष्ट केले.

क्लिक करा - अंकिता जळीतकांड : आरोपीतर्फे वकीलपत्र सादर; विकेश नगराळेची पत्नी, कुटुंबीयांची उपस्थिती

नियुक्तीनंतर घरोघरी फिरावे लागणार

डासांवर नियंत्रणासाठी राबविण्यात येणाऱ्या मोहिमेंतर्गत डास उत्पत्ती स्थळे तपासणीसांना घरोघरी फिरावे लागणार आहे. सध्या ही कामे महापालिकेतील चतुर्थ श्रेणी कर्मचारी करीत आहेत. तोकड्या मनुष्यबळातही महापालिकेने डेंगी, मलेरियावर नियंत्रण मिळवले. विज्ञान शाखेत प्रवेश घेताना मोठी स्वप्न बघणाऱ्या तरुणांना डासांची उत्पत्ती स्थळे शोधावे लागणार आहे.

अनेकांना महापालिकेत स्थायी होण्याची आशा

महापालिकेत आलेल्या अनेक तरुणांना ही नोकरी हंगामी असल्याची जाणीव आहे. परंतु या मोहिमेसाठी सरकार कालावधी वाढवेल तर एखादवेळी स्थायी होण्याची अपेक्षाही काहींनी व्यक्त केली. विज्ञान शाखेत पदव्यूत्तर असलेल्या प्रफुल्ल कुडेने सरकारी नोकरीच्या शोधात या नोकरीसाठी महापालिकेत पोहोचल्याचे सांगितले. समाजशास्त्रातील पदव्यूत्तर राजश्री मेश्राम तरुणीनेही नोकरीची गरज असल्याने मुलाखतीसाठी आल्याचे सांगितले.

संपादन - नीलेश डाखोरे