नागपूर : विधान परिषदेच्या नागपूर पदवीधर मतदारसंघासाठी होत असलेल्या निवडणुकीचा प्रचार रविवारी सायंकाळी थंडावला. मंगळवारी (ता. १) मतदान प्रक्रिया होणार आहे. उमेदवार आणि त्यांच्या कार्यकर्त्यांनी आता घरेघरी जाऊन मतदारांची प्रत्यक्ष भेट घेण्यावर भर दिला आहे.

निवडणुकीचे वारे वाहू लागताच पक्षस्तरावर प्रचारही सुरू करण्यात आला होता. एकूण १९ उमेदवार रिंगणात असून, मतदारांची संख्या २ लाख ६ हजार आहे. उमेदवारी अर्ज दाखल झाल्यानंतर प्रत्यक्ष प्रचाराला वेग आला. या मतदारसंघात पूर्व विदर्भातील सहाही जिल्ह्यांचा समावेश असल्याने उमेदवारांना प्रचारासाठी चांगलेच परिश्रम घ्यावे लागले.

सविस्तर वाचा - व्हॉट्‌सॲपमुळे पसरली प्रेमसंबंधाची माहिती; बदनामीच्या भीतीने तरुणीची आत्महत्या

प्रत्येक ठिकाणी उमेदवार जाऊ शकत नसल्याने स्थानिक पुढारी आणि कार्यकर्त्यांनी प्रचारची धुरा सांभाळली. प्रमुख पक्षांनी मेळावे, सभांवर भर दिला. त्यात दिग्गज नेत्यांनीही हजेरी लावली.

काँग्रेस, भाजपने ही निवडणूक प्रतिष्ठेची केली आहे. गत ५० वर्षांपासून वर्चस्व असलेला हा मतदारसंघ भाजपचा गड ठरला आहे. यंदा काँग्रेसकडून गडाला सुरुंग लावण्याचे प्रयत्न करण्यात आले आहे. दोन्ही मुख्य पक्षांसह अन्य उमेदवारांनीही व्यूव्हरचनेची आणखी केली. निवडणुकीचे महत्त्व लक्षात घेत पक्षश्रेष्ठ मुंबई व दिल्लीतून घडामोडींकडे लक्ष ठेवून आहेत. प्रचार संपल्याने आता छुप्या बैठका आणि मतदारांच्या प्रत्यक्ष भेटीचा कार्यक्रम सुरू करण्यात आला आहे.

क्लिक करा - अरे बापरे!  प्राचार्यांनीच केली प्राध्यापिकेला शरीरसुखाची मागणी

एक डिसेंबरला विशेष नैमित्तिक रजा

महाराष्ट्र विधान परिषदेच्या नागपूर विभाग पदवीधार मतदारसंघाच्या द्विवार्षिक निवडणुकीसाठी एक डिसेंबर रोजी मतदान होणार आहे. मतदानाचा हक्क बजावण्यासाठी सर्व शासकीय कार्यालयाचे विभाग प्रमुख तसेच खाजगी औद्योगिक आस्थापनामधील अधिकारी व कर्मचारी मतदार यांना एक दिवसाची विशेष नैमित्तिक रजा मंजूर केल्याचे निवासी उपजिल्हाधिकारी तथा आचारसंहिता कक्षाचे नोडल अधिकारी रवींद्र खजांजी यांनी प्रसिद्धीपत्रकाद्वारे कळविले आहे.

संपादन - नीलेश डाखोरे