नागपूर : हिंगणघाट येथील प्राध्यापिका अंकिता पिसुड्डे हिच्यावर पेटोल टाकून व तिला पेटवून तिचा खून करणारा आरोपी विक्की नगराळे याला सुरक्षेच्या दृष्टिकोनातून हिंगणघाट जिल्हा कारागृहातून नागपूर मध्यवर्ती कारागृहात बंदिस्त ठेवण्यात आले होते. त्याने कारागृहात असताना आत्महत्येचा प्रयत्न केल्याची चर्चा पसरली होती. मात्र, विक्कीवर पोलिस चोवीस तास नजर ठेवून असल्याने असा कोणताही प्रकार घडला नसल्याचे मध्यवर्ती कारागृह अधीक्षक अनुप कुमरे यांनी प्रसिद्धीपत्रकाद्वारे स्पष्ट केले. 

गेल्या 3 फेब्रुवारीला विक्की नगराळेने प्राध्यापिका अंकिता पिसुड्डे हिच्यावर पेटोल फेकले होते. त्यानंतर तिला पेटवून दिले होते. तिच्यावर अतिदक्षता विभागात उपचार सुरू असताना आठ दिवसानंतर तिचा मृत्यू झाला होता. या हत्याकांडात आरोपी विक्की नगराळे याला हिंगणघाट पोलिसांनी अटक केली होती, परंतु जनक्षोभ पाहता विक्कीची रवानगी सुरक्षेच्या दृष्टिकोनातून नागपूर मध्यवर्ती कारागृहात करण्यात आली होती. गेल्या 16 तारखेला त्याने कोठडीत आत्महत्येचा प्रयत्न केल्याची अफवा उडाली होती. मात्र, विक्कीने आत्महत्येचा कोणताही प्रयत्न केला नसल्याची प्रतिक्रिया कारागृह अधीक्षक अनुप कुंभरे यांनी प्रसारमाध्यमांना दिली. 

हे चाललय तरी काय? चिमुरडीवर अत्याचार, दुसरीवर बळजबरीचा प्रयत्न

विकेश याने सोमवारी (ता.तीन) सकाळी येथील अंकिताला पेटोल टाकून जाळले होते. घटनेच्या काही तासातच त्याला पोलिसांनी अटक केली होती. प्रारंभी त्याला शनिवार ( ता. 8) पर्यंत पोलिस कोठडी सुनावन्यात आली होती. या काळात पोलिसांनी त्यांचा तपास पूर्ण केल्याचे सांगण्यात येते.

मुख्यमंत्र्यांनी शब्द पाळला

 
हिंगणघाट जळीत प्रकरणात पीडितेच्या उपचारासाठी आलेला खर्च शासनाने परत केला आहे. उपचारासाठीचे 5 लाख 43 हजार 441 रुपये मुख्यमंत्री सहाय्यता निधीमधून रुग्णालयाला दिले होते. याशिवाय पीडितेच्या उपचारासाठी आधी 60 हजार रुपयांचा खर्च झाला होता. हा खर्च पीडितेच्या कुटुंबीयांनी केला होता. मुख्यमंत्र्यांनी शब्द पाळत 60 हजारांचा धनादेश पीडितेच्या वडिलांकडे सुपूर्द केला. मुख्यमंत्री वैद्यकीय सहाय्यता निधी कक्षाचे प्रमुख सदस्य सचिव डॉ. कमलेश सोनकुरे यांनी मदतीचा धनादेश हिंगणघाट येथे पोहचून उपविभागीय अधिकारी यांच्या सुपूर्द केला. त्यांनी तो धनादेश पीडितेच्या कुटुंबीयांकडे सोपविला.