नागपूर - पत्र व्यवहार म्हटले की सर्वप्रथम डोळ्यासमोर येते ते पोस्ट ऑफिस. साहजिकच पत्र किंवा कुरिअर करायचे झाल्यास आपण आजवर जवळचे टपाल कार्यालय गाठत होतो. स्पर्धेच्या या युगात टपाल खात्याने घरबसल्या ही सेवा उपलब्ध करून देण्याचा निर्णय घेतला आहे. ‘क्लिक ॲंड बुक’च्या माध्यमातून आता आपल्या कुरिअरची नोंदणी केल्यास पोस्टमन आपल्या घरी येऊन ते कुरिअर घेईल आणि नियोजित स्थळी पोहोचवेल.

टपाल खात आजपासून शुक्रवारपर्यंत (ता. १३) ‘राष्ट्रीय टपाल सप्ताह’ साजरा करीत आहे. यानिमित्त ही योजना उपलब्ध करून देण्यात आली असून, या सप्ताहानिमित्त आयोजित पत्रकार परिषदेत पोस्टमास्टर जनरल शोभा मधाळे यांनी ही माहिती दिली. जमाना व्हाट्सएपचा असला तरी, स्पर्धेच्या या युगात टपाल खात्याने आपला जम बसवला आहे. कुठल्या ना कुठल्या योजनांच्या माध्यमातून खाजगी क्षेत्राशी स्पर्धा करण्याचा प्रयत्न प्रत्येक वेळी टपाल खाते करताना दिसते. एरवी आधारकार्ड, पॅनकार्ड, वाहन परवाना,

पासपोर्ट अशी शासकीय कागदपत्रे पोहोचविण्यात व्यस्त असलेल्या या खात्याने आता ग्राहकांना आकर्षित करण्यासाठी ‘क्लिक ॲंड बुक’ ही नवी योजना आणली आहे. या सप्ताहामध्ये टपाल खाते उद्या वित्तीय सशक्तीकरण दिवस, बुधवारी पत्रव्यवहार दिवस, गुरुवारी मेल व पार्सल दिवस आणि शुक्रवारी अंत्योदय दिवस साजरा करीत असल्याचे यावेळी सांगण्यात आले. पत्रकार परिषदेला नागपूर शहर वरिष्ठ अधीक्षक रेखा रिझवी उपस्थित होत्या.

शहरातील २९ कार्यालयांकडून सुविधा जागतिक टपालदिनाचे औचित्य साधत सोमवारी टपाल खात्याने ही योजना सुररू केली असली तरी, नागपूरमध्ये तुर्तास शहरापूरती ही योजना मर्यादित आहे. पायलट प्रोजेक्टच्या अंतर्गत शहरातील २९ कार्यालयांतर्गत ही सेवा ग्राहकांसाठी सुरू करण्यात आली. या कार्यालयांच्या १० किलोमीटरच्या परिघात असणारे ग्राहक या सेवेचा लाभ घेऊ शकतील.

त्यासाठी www.indiapost.gov.in या वेबसाईटवरील ‘क्लिक ॲंड बुक’ या पर्यायावर आपला पीन कोड दाखल करीत या योजनेचा लाभ घेता येईल. देशातील १ हजारपेक्षा जास्त टपाल कार्यालयांतर्गत ‘क्लिक ॲंड बुक’ ही योजना आज सुरू झाली. तर, राज्यातील नागपूरसह मुंबई, पुणे, औरंगाबाद आणि गोवा या शहरांमधील नागरिकांना या सेवेचा लाभ घेता येईल.