हिंगणा : जलसंधारण विभागामार्फत 13 हजार धडक सिंचन विहीर योजना कार्यक्रम नागपूर जिल्ह्यात राबविण्यात येत आहे. दोन हजार विहिरींना मंजुरी देण्यात आली. यात पेंच व इतर लाभक्षेत्राचा समावेश आहे. कोरोनामुळे योजनेसाठी निधीचा तुटवडा निर्माण झाला आहे. खरीप हंगाम तोंडावर येऊन ठेपला असताना योजनेची कामे थंडबस्त्यात आहेत. परिणामी या योजनेवरच प्रश्नचिन्ह निर्माण झाले आहे. 

13 हजार धडक सिंचन विहीर योजनेअंतर्गत जिल्ह्यातील पेंच लाभक्षेत्रात तर इतर क्षेत्रांसाठी विहिरींना जलसंधारण विभागाने मंजुरी दिली. पेंच लाभक्षेत्रात नागपूर, कामठी, सावनेर, पारशिवनी, मौदा, रामटेक तालुक्‍यांचा समावेश आहे. इतर क्षेत्रात हिंगणा, उमरेड, काटोल, कुही, नरखेड, कळमेश्वर, भिवापूर, तालुक्‍यांचा समावेश असून, केवळ 500 विहिरींचे उद्दिष्ट देण्यात आले आहे. यामुळे इतर क्षेत्रांतील तालुक्‍याला 38 विहिरी मंजूर झाल्या आहेत. 

हेही वाचा : कुणी वाहनाने, तर कुणी पायी, घराच्या ओढीने निघाले मजुरांचे लोंढे

जिल्ह्यातील दोन हजार विहिरींसाठी जवळपास 12 कोटी 59 लाख रुपयांच्या निधीची मागणी करण्यात आली आहे. मात्र, कोरोनामुळे 4 कोटी 40 लाखांचा निधी उपलब्ध झाला आहे. तोकड्या स्वरूपात निधी मिळाल्याने केवळ 176 विहिरींची कामे होण्याची शक्‍यता आहे. पुढील वर्षी 2020-2021मध्ये कोरोनामुळे या योजनेसाठी निधी मिळणार की नाही, याबाबत साशंकता व्यक्त केली जात आहे. यामुळे शासनाने दिलेले योजनेचे उद्दिष्ट कसे गाठायचे, असा प्रश्न जलसंधारण विभागाच्या अधिकाऱ्यांना पडला आहे. 
खरीप हंगामापूर्वी जलसंधारण मंत्रालयाने याबाबत निधी उपलब्ध करून देण्यासाठी प्रयत्न करणे गरजेचे आहे. अन्यथा शेतकऱ्यांसाठी महत्त्वपूर्ण असलेली सदर योजना कागदावरच राबवली जाण्याची शक्‍यता वर्तवली जात आहे. 

सन 2019-20 - पेंच लाभक्षेत्रातील विहिरींचा लक्ष्यांक 
 
तालुका                          मंजूर विहिरी 
1. नागपूर-                        04 
2. कामठी-                        126 
3. सावनेर-                        44 
4. रामटेक-                       204 
5. पारशिवनी-                   497 
6. मौदा- 625 
 एकूण-                           150

शेतकऱ्यांसाठी 13 हजार धडक सिंचन विहीर योजना कार्यक्रम महत्त्वपूर्ण आहे. या योजनेसाठी साडेबारा कोटी रुपयांच्या निधीची गरज आहे. मात्र, साडेचार कोटी उपलब्ध झालेत. कोरोनामुळे निधी मिळण्याची शक्‍यता धूसर आहे. उपलब्ध निधीतून 176 विहिरींचे काम करता येणार आहे. कामाला प्रशासकीय व तांत्रिक मंजुरी मिळाली आहे. बीडीओंना याबाबत कार्यारंभ आदेश देण्याची प्रक्रिया सुरू आहे. मात्र, लॉकडाउनच्या भवितव्यावर सर्व काही अवलंबून आहे. 
-बंडू सयाम, जिल्हा जलसंधारण अधिकारी, नागपूर.