नागपूर - केरळमधील कोझिकोड विमानतळावर झालेल्या दुर्घटनेत एअर इंडिया एक्स्प्रेस विमानातील 17 जणांसह पायलट कॅप्टन दीपक साठे यांचाही मृत्यू झाला आहे. कॅप्टन दीपक साठे आज (शनिवार 8 ऑगस्ट) त्यांच्या आईचा 84 वा वाढदिवस साजरा करणार होते. यासाठी थेट नागपूर इथं जाऊन आईला सरप्राइज देण्याची त्यांची इच्छा होती. मात्री त्याआधीच झालेल्या विमान दुर्घटनेत त्यांच्यावर काळाने घाला घातला. 

दीपक साठे यांचे नातेवाइक डॉक्टर यशोधन साठे यांनी सांगितलं की, कॅप्टन साठे यांच्या आईचा शनिवारी वाढदिवस आहे. त्यांनी मार्च महिन्यात शेवटचं आई वडिलांची भेट घेतली होती. फोनवरून दीपक साठे नेहमीच त्यांच्या संपर्कात असायचे. दुर्घटनेच्या आधी दोन दिवस त्यांच्याशी फोनवरून बोलणं झालं होतं. तसंच काही नातेवाइकांना सांगितलं होतं की जर प्रवासाची सोय झाली तर आईच्या वाढदिवसाला नागपूरला पोहचून तिला सरप्राइज देईन. 

हे वाचा - राखेतून भरारी घेणारा वैमानिक; अपघातातून झाला होता पुनर्जन्म 

कॅप्टन दीपक साठे हे पत्नीसह मुंबईत राहत होते. तर त्यांची आई नीला साठे आणि लष्करातून निवृत्त झालेले वडील कर्नल वसंत साठे हे नागपूरला राहतात. कोरोनाच्या संकटात कॅप्टन साठे यांनी आई वडिलांना घरातून बाहेर पडू नका असं सांगितलं होतं. कॅप्टन साठेंची आई नीला म्हणाल्या की, आम्ही घरातून बाहेर पडू नये असं त्याला वाटायचं. आम्हाला काही झालं तर त्याला जास्त दु:ख झालं असतं आणि आता ही दुर्घटना झाली.

दीपक साठेंच्या आईने सांगितलं की, ते खेळ असो किंवा अभ्यास सगळ्यात पुढे असायचे. टेबल टेनिस आणि स्क्वॅशमध्ये उत्कृष्ट खेळायचा. घोडेसवारीसुद्धा चांगली करायचा. माझ्या मुलाला स्वॉर्ड ऑफ ऑनरसुद्धा मिळाला पण या सन्मानाचे किंवा पुरस्कारांची त्याने कधीच चर्चा केली नाही. 

हे वाचा - घरी चिमुकल्या पावलांची चाहूल आणि वडिलांनी विमान अपघातात सोडले प्राण

हवाई दलाचे सर्व आठ पुरस्कार मिळवणारे दीपक साठे हे पहिले महाराष्ट्रीयन होते. लोकांची मदत करणं आणि त्यासाठी काहीही कऱण्याची त्यांची तयारी असायची असं त्यांच्या आईने म्हटलं. गुजरातमध्ये आलेल्या पुरावेळी कॅप्टन दीपक साठेंनी सैनिकांच्या मुलांना खांद्यावर उचलून वाचवलं होतं. दीपक साठेंचा मोठा भाऊ विकास साठे हे सुद्धा लष्करात लेफ्टनंट होते. त्यांचाही अपघातात मृत्यू झाला होता.