नागपूर : प्रसिद्धी माणसाची असो किंवा वस्तूची, त्यासाठी प्रत्येक जण नव-नव्या फंड्यांचा शोध घेत असतो. वस्तूच्या जाहिरातीसाठी प्रसिद्धीचा विचार केल्यास बातच काही निराळी. कलकत्ता येथील तरुणाने देखील असाच एक फंडा शोधून काढला आहे आणि तो देखील चक्क टिशू पेपरच्या मदतीने मार्केटिंग (marketing through tissue paper ) करण्याचा. त्याचे नाव आहे सुमंगल पुगलिया.

त्याच्या वडिलांचा स्टॉक मार्केटचा व्यवसाय. त्यांच्या पावलावर पाऊल टाकत सुमंगलनेसुद्धा ‘व्यवसायंच करायचा’, असा निश्‍चय महाविद्यालयीन जीवनात केला. मोठे व्यावसायिक आपल्या वस्तू विकण्यासाठी लाखो रुपये खर्च करतात. मात्र, छोट्यात छोट्या व्यावसायिकाचे मार्केटिंगसाठी तितकेसे बजेट नसते. ही बाबत हेरून त्याने आपली वाणिज्य शाखेतील पदवी पूर्ण केल्यानंतर मार्केटिंगच्या जगात प्रवेश करण्याचा निर्णय घेतला आणि फक्त छोट्या व्यावसायिकांनाच सेवा द्यायची, हा निश्‍चय केला.

प्रत्यक्ष काम करताना जाहिरात, बॅनर या शुल्लक वाटणाऱ्या बाबीदेखील काही व्यावसायिकांना परवडण्यासारख्या नाही, ही बाब सुमंगलच्या निदर्शनास आली. त्यामुळे, मार्केटिंगचे शुल्क अत्यल्प व्हावे या दृष्टीने तो विचार करू लागला. अशातच टिशू पेपरवर व्यवसायाची जाहिरात छापत मार्केटिंग करण्याची युक्ती त्याला सुचली आणि त्याने त्याचे सोने केले. त्याच्या या युक्तीमुळे आज जवळपास दोनशे ते अडीचशे व्यावसायिकांना आपल्या व्यवसायामध्ये फायदा झाला आहे. कलकत्ता, महाराष्ट्रासह ओरिसा, आसाम, मेघालय, नागालँड, मणिपूर, मिझोराम या प्रदेशातील छोट्या व्यावसायिकांसाठी त्याच्या पॅसिफिक डिझाईन या कंपनीच्या माध्यमातून तो काम करतो आहे.

स्वत:च तयार करा डिझाइन -

आपल्या वस्तूचे मार्केटिंग करताना आपण स्वत:च डिझाइन तयार करू शकतो. यासाठी सुमंगलने खास www.pacificdesigns.in ही वेबसाइट तयार केली आहे. डिझाइन तयार करण्यासाठी अत्यंत सोपी पद्धत या वेबसाइटवर दिली आहे. शिवाय, काही तयार नमुने निवडूनसुध्दा आपण आपल्या मालासाठी डिझाईन निवडू शकतो.