नागपूर : मुलाबाळांना भविष्यात कामी येईल या हेतूने मित्राच्या आग्रहाखातर प्लॉट घेतला. काही वर्षांनी येऊन पाहतो तर काय प्लॉटवर एका महिलेने झोपडीवजा घर बांधलेले. तिला विचारलं तर ती तोऱ्यात म्हणाली याचे पैसे मी प्लॉटच्या मालकाला दिले आहेत. मी म्हटलं, अरे पण प्लॉट तर माझ्या मृत बायकोच्या नावे आहे व तुम्ही मला भेटलाही नाहीत. तर ती उत्तरली मी बक्कळ पैसे मोजून हा प्लॉट खरेदी केला आहे. बाकी मला काही माहित नाही. निघा आता.

६५ ते ७० वर्ष असलेले अंध बन्सपती वर्मा (रा. इंदूर, मध्य प्रदेश) केविलवाण्या स्वरात सांगत होते. बन्सपती यांचे कामानिमित्त नागपूरला नेहमी येणे जाणे होते. मित्राच्या आग्रहाखातर १९८९ मध्ये गोरेवाडा परिसरात १५०० स्क्वेअर फूट प्लॉट घेतला. सदगुरू सरन कोऑपरेटिव्ह सोसायटीमध्ये ९ नंबरच्या प्लॉटची बायकोच्या नावाने रजिस्ट्रीही केली. दरम्यान, इंदूरला स्थायिक झालो. अचानक संकटांची मालिका सुरु झाली. पत्नीचा मृत्यू झाला. 

हेही वाचा - राष्ट्रवादीच्या ट्विटने खळबळ; काँग्रेसवरच घेतला अन्याय होत असल्याचा संशय

या संकटातून बाहेर पडतो न पडतो तोच एक दिवस काही दिसेनासे झाले. अनेक उपचार केले परंतु लाभ झाला नाही. घरच्यांनी एका गरीब मुलीसोबत माझे दुसरे लग्न करून दिले. एक मुलगी झाली. पत्नीच रोजंदारी करून घर चालवीत आहे. मुलीच्या पुढील शिक्षणासाठी प्लॉटची विक्री करून पैसे गाठीशी जोडावे यासाठी नागपूरला आलो. एका हितचिंतकासोबत प्लॉटवर गेलो. तेव्हा तेथे एका महिला घर बांधून राहत असल्याचे समजले. तिला याबाबतीत विचारले असता तिने फटकळपणे उत्तर देत परत येथे यायचे नाही असे सांगितले. २०१२ पासून शक्य होईल तसे येथे येतो, विनंती करतो, हातपाय जोडतो मात्र सगळं व्यर्थ.

भूमाफियांचा गनिमी कावा

उपराजधानीत भूमाफिया मोकळे असलेले प्लॉट, भूखयांवर अतिक्रमण करतात. तेथे महिलांना छोटेसे घर बांधून देत प्लॉटची परस्पर दुसऱ्यांना विक्री करतात. प्लॉटचा मालक याबाबत जाब विचारायला गेला की या महिला समोर येतात. भूमाफिया समोर येतच नाही. महिलांविषयी कायदे कठोर असल्याने पोलिसांची उगाच कटकट नको म्हणून आल्यापावली माघारी परतावे लागते. भूमाफियांचा हा गनिमी कावा समजून घेत मुळ प्लॉटधारकांना न्याय मिळावा, असे सामाजिक कार्यकर्ते मलकवाडी म्हणाले.

हेही वाचा - आता ना थांबत श्वास, ना चुकत काळजाचा ठोका; कुठं हरवलाय 'तो' थरार?

मध्यस्थांच्या मार्फत बोलणीचा प्रयत्न केला. पोलिसांतही तक्रार केली. मात्र काहीच हाती आले नाही. शासन, प्रशासनाने आम्हा गरिबांचे दुःख जाणून योग्य ती कारवाई करत प्लॉट परत मिळवून द्यावा हीच विनंती आहे.
-बन्सपती वर्मा, 
पीडित प्लॉटधारक