रामटेक (जि. नागपूर) : रामटेक पोलिस ठाण्यापासून अवघ्या दोन किलोमीटर अंतरावर एका तेरा वर्षीय मुलीवर गावातीलच पाच युवकांनी आळीपाळीने अत्याचार केल्याची घटना घडली. २९ डिसेंबरला सायंकाळी सात वाजताच्या सुमारास ही घटना उघडकीस आली. दोन जानेवारीला पीडित मुलीने रामटेक पोलिस ठाण्यात तक्रार दाखल केली.

फिर्यादीने सांगितल्याप्रमाणे, अतुल विश्‍वनाथ हटवार (रा. अंधळगाव, ता. मोहाळी, जि. भंडारा) याने जबरदस्तीने दुचाकीवर बसवून खिंडसी तलाव परिसरातील डोंगराजवळील घनदाट झाडीत घेऊन गेला. तिथे पोहोचल्यानंतर त्याचे मित्र धीरज मेहरकुळे, सौरभ मेहरकुळे, होमदास मेहरकुळे, हर्षल मेहरकुळे (सर्व रा. दुधाला, कवडक) यांना फोनवरून बोलावून घेतले. तिथे जबरदस्तीने आळीपाळीने शारीरिक सबंध प्रस्थापित केले.

घटना घडल्यानंतर अल्पवयीन मुलीने रडत रडत आई-वडिलांना हकीकत सांगितली. आई-वडिलांनी पोलिस ठाणे गाठून पोलिसांत तक्रार केली. माहिती मिळताच नागपूर ग्रामीण पोलिस अधीक्षकांच्या मार्गदर्शनाखाली नयन आलूरकर, पोलिस निरीक्षक प्रमोद मकेशवर, कर्मचारी वर्ग यांनी शिताफीने गुन्ह्यातील पाचही आरोपीला तात्काळ अटक केली.

अधिक माहितीसाठी - गाढ झोपेत असताना आला मोठा आवाज, घराबाहेर धाव घेताच दिसलं थरारक दृश्य

आरोपीवर अत्याचाराचा गुन्हा व अनुसूचित जाती-जमाती अत्याचार प्रतिबंधक कायद्यानुसार गुन्हा दाखल करण्यात आला आहे. तीन जानेवारीच्या सकाळपर्यंत पोलिस तपास करीत होते. या दरम्यान दोन जानेवारीला ग्रामीणचे पोलिस अधीक्षक राकेश ओला यांनीही भेट दिल्याचे पोलिस निरीक्षक प्रमोद मकेशवर यांनी सांगितले. या गुन्ह्याच्या तपास रामटेक पोलिस उपविभागीय अधिकरी नयन आलूरकर करीत आहेत.

संपादन - नीलेश डाखोरे