नागपूर : राष्ट्रसंत तुकडोजी महाराज नागपूर विद्यापीठ आणि संलग्नित महाविद्यालयातील पदव्युत्तर प्रवेश प्रक्रिया शनिवारपासून (ता. ५)पासून सुरू करण्यात आली. दोन दिवसांत ५ हजार ६०१ विद्यार्थ्यांनी नोंदणी केली आहे. त्यापैकी ८१९ विद्यार्थ्यांनी अर्ज निश्चित केले आहेत. विद्यार्थ्यांना १२ डिसेंबरपर्यंत अर्ज करता येईल. यंदा पदवी परीक्षेच्या निकालात सुमारे ५० टक्क्यांपर्यंत वाढ नोंदविली गेली आहे. यामुळे काही विषयांमध्ये प्रवेशासाठी गर्दी होण्याची शक्यता नाकारता येत नाही. 

हेही वाचा - Bharat Band Updates : अमरावतीत संमिश्र प्रतिसाद, काही ठिकाणी आंदोलकांची धरपकड

नागपूर विद्यापीठाने कोरोनाच्या पार्श्वभूमीवर यंदा अंतिम वर्षांच्या परीक्षा ऑनलाइन घेतल्या. आतापर्यंत ८० टक्क्यांहून अधिक विषयांचे निकाल लागले आहेत. उत्तीर्ण विद्यार्थ्यांना पदव्युत्तर अभ्यासक्रमात प्रवेश देण्यासाठी ५ डिसेंबरपासून विद्यापीठात ऑनलाइन केंद्रभूत प्रक्रिया राबविली जाणार आहे. प्रवेश प्रक्रियेत एमएस्सी, एम.कॉम., एम.कॉम. प्रोफेशनल, एलएलएम, एमसीटी, मास्टर ऑफ हॉस्पिटॅलिटी मॅनेजमेंट, एमसीएम, एमआयआरपीएम यांसारख्या अभ्यासक्रमांचा समावेश आहे.

हेही वाचा - अमरावतीतील बाळाचे मृत्यूप्रकरण : आई, वडिलांची डीएनए...

दोन टप्प्यांत प्रवेश पूर्ण होतील. विद्यापीठाच्या अधिसूचनेनुसार विद्यापीठाच्या पदव्युत्तर शैक्षणिक विभागांसह संलग्नित महाविद्यालयांतील पदव्युत्तर अभ्यासक्रमांसाठी ऑनलाइन प्रवेश होतील. विद्यापीठ स्तरावर दोन टप्प्यांतील प्रवेश पूर्ण झाल्यानंतर उर्वरित जागांवर महाविद्यालय स्तरावर प्रवेश होतील. यानंतर जागा रिक्त राहिल्यास विद्यार्थ्यांना गुणवत्ता यादीनुसार प्रवेश दिले जातील. विद्यार्थ्यांना प्रवेशासाठी ५ ते १२ डिसेंबरपर्यंत www.rtmnu.university या संकेतस्थळावर अर्ज करता येणार आहे. १६ डिसेंबरला तात्पुरती गुणवत्ता यादी जाहीर केली जाईल. त्यानंतर १८ डिसेंबरपर्यंत त्यावर आक्षेप नोंदविता येऊ शकेल. २० डिसेंबरला अंतिम यादी जाहीर होईल.