Nagpur MSRTC Tourism Discontinued: जिल्ह्यातील महत्त्वाच्या पर्यटनस्थळांना भेटी देण्यासाठी राज्य मार्ग परिवहन महामंडळ (एसटी)ने पर्यटन बस सेवा सुरू केली होती. मात्र, कोरोनापासून बंद केलेली ही सेवा आता कायमची बंद होणार का? असा सवाल पर्यटन प्रेमी व प्रवाशांकडून होऊ लागला आहे.

नागपूर-भंडारा जिल्ह्याच्या सीमेवरील अंभोरा येथे वैनगंगा नदीवरील केबल-स्टेड पुलाचे लोकार्पण नुकतेच झाले. पर्यटक मोठ्या संख्येने हा आधुनिक पूल बघायला जात आहेत. जिल्ह्यात अनेक पर्यटन स्थळे आहेत.

एसटी प्रशासनाने गणेशपेठ आगारातून अशा काही मोजक्या पर्यटन स्थळांना भेटी देण्यासाठी ‘पर्यटन बस’ सुरू केली होती. यात ड्रॅगन पॅलेस टेम्पल, रामटेक गड मंदिर, सुराबर्डी, आदासा, धापेवाडा, रामटेक खिंडसी तलाव आदी आठ स्थळांचा समावेश होता.

सकाळी ८ ते रात्री ८ असा एक दिवसाचा हा बसप्रवास होता. सहलीचा लाभ घेणाऱ्यांनी किमान १ दिवसाआधी बुकिंग करायची होती. एका प्रवाशांसाठी एसटीकडून २२५ रुपये आणि आरक्षणासाठी ५ रुपये असे २३० रुपये आकारल्या जात होते. पूर्वी ऑनलाइन बुकिंगची सुद्धा सुविधा होती. बसमध्ये ४४ सीटची क्षमता आहे. दर रविवारी ही बस गणेशपेठ आगारातून सकाळी सुटायची. (Latest Marathi News)

त्याचप्रमाणे राष्ट्रीय सुटी, सण व उत्सव तसेच मागणीनुसार शनिवारी सुद्धा ही बस असायची. ‘पर्यटन बस’मध्ये ग्रुप बुकिंग, कौटुंबिक प्रवास, सहल, ज्येष्ठ नागरिकांचा गट तसेच नागपूरच्या बाहेरील पर्यटकांकडून सुद्धा या बसची बुकिंग व्हायची. प्रवासी जास्त असल्याने याला दुसऱ्या बसची साथही मिळायची. मात्र, कोरोनापासून बंद झालेली ही सेवा अद्यापही सुरू झालेली नाही.(Latest Marathi News)

‘पर्यटन बस’ ही चांगली सेवा होती. लोकांचा त्याला प्रतिसादही उत्तम होता. मात्र, कोरोनामध्ये ही सेवा बंद झाली. आता या यासंदर्भात आढावा घेऊन विभागाकरिता लवकरच पत्र काढणार आहे.- श्रीकांत गभने, उपमहाव्यवस्थापक- नागपूर व अमरावती विभाग, एसटी महामंडळ