नागपूर : मोमीनपुऱ्यातील कुख्यात गुंड छोटा इब्राहिम याचे यशोधरानगरातून तिघांनी अपहरण केले. त्याच्या पोटात चाकू भोसकून खून केला. मृतदेह पोत्यात टाकून कन्हान नदीच्या वाहत्या पाण्यात फेकून दिला. ही खळबळजनक घटना शनिवारी मध्यरात्री उघडकीस आली. या प्रकरणी दोन आरोपींना पोलिसांनी अटक केली होती.

पोलिसांनी दिलेल्या माहितीनुसार, इब्राहिम खान ऊर्फ छोटा इब्राहिम (२२, रा. बोरियापुरा, मोमिनपुरा) हा कुख्यात गुंड असून त्याच्यावर अर्धाडझन गुन्हे दाखल आहेत. त्याचा एका युवकाच्या हत्याकांडातही समावेश होता. पोलिसांनी छोटा इब्राहिमवर तडीपार आणि एमपीडीएची कारवाईसुद्धा केली होती.

दोन महिन्यांपूर्वीच पोलिसांनी त्याला दरोडा टाकण्याच्या तयारीत असतानाही त्याला पकडले होते, परंतु तो पळून गेला होता. पोलिसांच्या अटकेपासून वाचण्यासाठी तो यशोधरानगरातील मित्राच्या घरी लपून बसला होता. तो चोरून-लपून मोमीनपुऱ्यात येत होता. त्यामुळे त्याच्या कुटुंबीयांनी इब्राहिमबाबत बेपत्ता होण्याची तक्रार दाखल केली नव्हती.

अपहरण करून केला खून

छोटी इब्राहिमचे आरोपी राशिद खान (रा. कामठी), शम्मी, सोनू ऊर्फ इमरान आणि अरबाज यांनी यशोधरानगरातून अपहरण केले. त्याला निजामुद्दीन कॉलनीतील एका ईटाभट्टीजवळ नेले. त्याच्यावर तलवार-चाकूने हल्ला केला. त्याच्या पोटातील आतड्या बाहेर काढल्यानंतर मृतहेद पोत्यात भरून कन्हानकडे नेण्यात आले.

तीन दिवसांपासून होता बेपत्ता

छोटा इब्राहिम याचे तीन दिवसांपूर्वीच चौघांनी अपहरण केल्याची माहिती त्यांच्याच एका मित्राने पोलिसांना दिली. त्यावरून सोनू आणि शम्मूला पोलिसांनी ताब्यात घेतले. त्यांनी इब्राहिमचा खून करून कन्हान नदीच्या वाहत्या पाण्यात मृतदेह फेकल्याची माहिती दिली. त्यावरून पोलिसांनी इब्राहिमच्या कुटुंबीयांना कन्हानला नेले. पाण्यात दोन मृतदेह आढळले होते. त्यापैकी एक मृतदेह इब्राहिमचा असल्याचे स्पष्ट झाले. यशोधरानगर पोलिसांनी गुन्हा दाखल केला असून दोन आरोपींना अटक केली तर दोन आरोपींचा शोध सुरू केला आहे.