Nagpur Theft Case: नवीन कामठी पोलीस ठाण्याचा हद्दीतील यादवनगरात घराच्या बांधकामाच्या ठिकाणी असलेले नळाच्या फिटींगचे साहित्य चोरणाऱ्यास नागरिकांनी पकडून पोलिसांच्या स्वाधीन केले. ही घटना गुरुवारी (ता.२८) रात्री अकरा वाजताच्या सुमारास उघडकीस आली होती. ज्ञानसिंग सत्यनारायण यादव (वय ६२) यांनी दिलेल्या तक्रारीवरून पोलिसांनी गुन्हा दाखल करीत अटक केली.

मेहबुब शेख वल्द मैनु शेख (वय २५, रा. अब्दुलशहा दर्गा जवळ, चित्तरंजन नगर, कामठी) असे आरोपीचे नाव आहे. ज्ञानसिंग यांच्या यादवनगर येथील घराचे बांधकाम सुरू असून त्यासाठी त्यांनी नळाच्या फिटींगचे संपूर्ण साहित्य खरेदी करून आणले होते.

मेहबूब नळ फिटींगचे साहित्य चोरून नेत असता दिसल्याने, त्याला लोकांच्या मदतीने पकडून पोलिसांचा ताब्यात दिले. याप्रकरणी पोलिसांनी तपास सुरू केला आहे.