Nagpur : जिल्ह्यात खनिज प्रतिष्ठानमधून लावण्यात आलेल्या ग्रीन जिमची चौकशी सुरू करण्यात आली आहे. जिल्हा परिषदेमधील बांधकाम विभागाच्या कार्यकारी अभियंत्या कल्पना इखार यांनी काही तालुक्यांमधील ग्रीन जिमची प्रत्यक्ष पाहणी केली.

खनिज प्रतिष्ठानमधून जिल्ह्यात २०० गावांमध्ये ग्रीन जिम लावण्यात येणार आहे. यासाठी १२ कोटींवर खर्च होणार आहे. पहिल्या टप्प्यात काही गावांमध्ये जिमचे साहित्य लावण्यात आले. परंतु ग्रीन जिमचा विषय सुरुवातीपासूनच वादात सापडला आहे. खनिज प्रतिष्ठानच्या कौशल्य विकास लेखाशीर्ष अंतर्गत ग्रीन जिम मंजूर करण्यात आल्याने त्यावर आक्षेप घेण्यात आला होता.

ग्रीन जिमचे साहित्य महागडे खरेदी करण्यात आले. जिल्हा परिषदेच्या समाज कल्याण विभागाकडून लावलेले जिमचे साहित्य तुलनेत कमी रुपयांचे असल्याचा मुद्दा सदस्यांनी जिल्हा परिषदेच्या सभेत उपस्थित करीत याच्या चौकशीची मागणी केली होती. जिमचे साहित्य गावाच्या बाहेर लावण्यात आल्याचाही आरोप सदस्यांचा होता.

त्यानंतर अध्यक्षा मुक्ता कोकड्डे यांनी समितीमार्फत चौकशी करण्याचे निर्देश दिले होते. त्यानंतर याच्या चौकशीसाठी बांधकाम विभागाकडून समिती गठित करण्यात आली. यात बांधकाम विभागाच्या कार्यकारी अभियंता, एक उपअभियंता व तीन जिल्हा परिषद सदस्यांचा समावेश आहे. सूत्रांकडून मिळालेल्या माहितीनुसार, कार्यकारी अभियंत्यांनी नुकतीच काही जिमची पाहणी केली. त्यांच्यासोबत एक उपअभियंताही होता. त्यांच्याकडून लवकरच चौकशी अहवाल येण्याची अपेक्षा आहे. (Latest Marathi News)

सूत्रांकडून मिळालेल्या माहितीनुसार, कंत्राटदाराकडून पहिल्या टप्प्यात लावलेल्या साहित्यासाठी देयक अदा करण्याचा प्रस्ताव देण्यात आला. परंतु अद्याप देयके अदा करण्यात आले नाही. विशेष या प्रकरणात केंद्राच्या एका पथकाने येऊन जिल्हाधिकाऱ्यांकडून सर्व माहिती घेतली आहे.