नागपूर : भंडारा जिल्हा रुग्णालयात १० नवजात आगीच्या भक्ष्यस्थानी सापडून मरण पावल्याची मनाला पिळवटून टाकणारी घटना काल मध्यरात्रीनंतर घडली. जिल्हा रुग्णालयाचे फायर ऑडिट आणि इलेक्ट्रिकल ऑडिट झाले नसल्याची माहिती हाती येत आहे.

या घटनेची तात्काळ चौकशी करण्याचे आदेश मुख्यमंत्री उद्धव ठाकरे यांनी दिले आहे. मृत बालकांच्या कुटुंबीयांना प्रत्येकी पाच लाख रुपयांची मदत मुख्यमंत्र्यांनी जाहीर केली आहे. 

हेही वाचा - कशी नशिबानं थट्टा आज मांडली!, स्मशानभूमीचा रस्ता अडविल्याने अंत्ययात्रा थांबली, अंत्यसंस्कारासाठी चार तासापासून प्रेत रस्त्यावर

काल मध्यरात्रीनंतर घडलेल्या या घटनेने अनेक यंत्रणेच्या कार्यक्षमतेवर आणि प्रणालीवर अनेक प्रश्‍न उभे केले आहेत. जिल्हा रुग्णालयाचं फायर ऑडिट झाले नसल्याचे जिल्हा शल्य चिकित्सक यांनी माध्यमांच्या प्रतिनिधींना सांगितलं आहे. फायर ॲाडिट का करण्यात आले नाही, इलेक्ट्रिकल ऑडिट का झाले नाही आणि त्या वॅार्डात २४ तास परिचारिका होती का, असे एक ना अनेक प्रश्‍न या घटनेने उभे केले आहेत. अतिशय धक्कादायक आणि दुःखद माहिती आज सकाळीच हाती आली. शॉर्ट सर्किटने ही आग लागल्याचा प्राथमिक अंदाज वर्तविण्यात आला आहे. 

हेही वाचा - चालत्या बसमध्ये महिलेला अचानक सुरू झाल्या प्रसुतीकळा, कंडक्टरच्या लक्षात येताच

भंडारा येथील जिल्हा रुग्णालयात शिशू केअर युनिटला लागलेल्या आगीत नवजात अर्भकांच्या झालेल्या मृत्यूबद्दल मुख्यमंत्री उद्धव ठाकरे यांनी तीव्र दुःख व्यक्त केले आहे. ही घटना कळताच त्यांनी आरोग्य मंत्री राजेश टोपे यांच्याशी बोलून या संपूर्ण घटनेची तात्काळ चौकशी करण्याचे निर्देश दिले आहेत. मुख्यमंत्री हे जिल्हाधिकारी तसेच पोलीस अधीक्षक यांच्याशी देखील बोलले असून त्यांनाही तपासाचे निर्देश देण्यात आले आहेत.

(संपादन - विवेक मेतकर)