नागपूर - जिल्हादंडाधिकारी यांच्या अध्यक्षतेखाली नागपूर जिल्ह्यात (Nagpur District) ध्वनी प्रदूषण (Sound Pollution) (नियमन व नियंत्रण) नियमाच्या अंमलबजावणीबाबत महाराष्ट्र शासन पर्यावरण विभागाची आढावा बैठक पार पडली. निवासी उपजिल्हाधिकारी विजया बनकर यांनी आढावा घेतला. यावेळी सहायक पोलिस आयुक्त नितीन जगताप, पोलिस निरीक्षक संजय पुरंधरेसह संबंधित विभागाचे अधिकारी उपस्थित होते.

बैठकीत जिल्हादंडाधिकारी यांच्या वतीने जिल्ह्यात १ जानेवारी २०२२ ते ३१ डिसेंबर २०२२ या कालावधीत १५ पैकी १३ दिवस सकाळी ७ वाजल्यापासून ते रात्री १२.०० वाजेपर्यत ध्वनीक्षेपक व ध्वनीवर्धक वापरण्याची परवानगी देण्याबाबतचा निर्णय घेण्यात आला. तसेच उर्वरीत २ दिवस हे स्थानिक परिस्थिती व आवश्यकतेनुसार निश्चित करण्यात येतील, असे ठरविण्यात आले. यामध्ये शिवाजी महाराज जयंती, १० एप्रिल रामनवमी, १४ एप्रिल डॉ. बाबासाहेब आंबेडकर जयंती, १६ एप्रिल हनुमान जयंती, १६ मे बुद्ध पोर्णिमा, ३१ ऑगस्ट, ५ सप्टेंबर, ९ सप्टेंबर गणपती उत्सव, ३ आक्टोंबर नवरात्री उत्सव, ५ आक्टोबर दसरा- धम्मचक्र प्रवर्तन दिन, ९ ऑक्टोबर ईद- ए-मिलाद, २५ डिसेंबर क्रिसमस, ३१ डिसेंबर नववर्ष आगमन उत्सव या सन- उत्सवाचा समावेश आहे.