नागपूर : सार्वजनिक सुटीचा दिवस असल्यामुळे अनेकांनी कामानिमित्त रविवारी सहकुटुंब घराबाहेर पडण्याचे बेत आखले होते. मात्र वरुणराजाने त्यांच्या मनसुब्यांवर पाणी फेरले. दुपारपासून सायंकाळपर्यंत शहरात बरसलेल्या संततधार पावसामुळे बहुतेकांना सुटी घरीच चार भिंतीच्या आड घालवावी लागली. पावसामुळे एकीकडे काहींची तारांबळ उडाली, त्याचवेळी अनेकांनी पावसाचा व आल्हाददायक वातावरणाचा आनंदही घेतला.

मध्य भारतावर कमी दाबाचा पट्टा तयार झाल्यामुळे वरुणराजा सध्या ‘ॲक्टिव्ह मोड’वर आहे. प्रादेशिक हवामान विभागाने जारी केलेल्या ‘यलो अलर्ट’चा प्रभाव रविवारी उपराजधानीत तीव्रतेने जाणवला.

मॉन्सून केवळ नागपुरातच नव्हे, विदर्भातील सर्वच जिल्ह्यांमध्ये सध्या पूर्णपणे सक्रीय आहे. शहरात दुपारी एकपर्यंत ढगाळ वातावरण राहिल्यानंतर अचानक जोरदार पावसाला सुरुवात झाली. जवळपास तीन ते चार तास शहरात सगळीकडेच कमी अधिक प्रमाणात संततधार पाऊस बरसला.

दमदार पावसामुळे रस्त्यांवर सर्वत्र पाणीच पाणी दिसत होते. खोलगट भागांमध्येही जागोजागी पाणी तुंबले होते. त्यामुळे नागपूरकरांना दिवसभर रेनकोट व छत्र्या घेऊन फिरावे लागले. सायंकाळपर्यंत शहरात सरींवर सरी सुरू होत्या.

पाऊस व ढगाळ वातावरणामुळे आर्द्रता वाढल्याने तापमानात अडीच अंशांची घट झाली. परिणामतः वातावरण गारेगार झाले होते. अंधार पडल्याने वाहनधारकांना हेडलाईट सुरू ठेवत वाहने चालवावी लागली.

पावसामुळे एकीकडे पावसामुळे नागपूरकरांची तारांबळ उडाली, मनस्ताप सहन करावा लागला. त्याचवेळी अनेकांनी पावसाचा व आल्हाददायक वातावरणाचा आनंदही घेतला. रविवार सुटीचा दिवस असल्यामुळे बहुतांश जण विशेषतः सरकारी कर्मचारी घरी होते. रिपरिप पावसामुळे त्यांना अख्खा दिवस चार भिंतीच्या आडच घालवावा लागला.

हवामान विभागातर्फे सायंकाळी साडेपाचपर्यंत शहरात ३१ मिलिमीटर पावसाची नोंद करण्यात आली. विदर्भात सर्वाधिक पाऊस (१४५ मिलिमीटर) ब्रम्हपुरी येथे पडला. याशिवाय गोंदिया (८८ मिलिमीटर) व गडचिरोली (७५ मिलिमीटर) येथेही मुसळधार पावसाने दाणादाण उडविली.

विदर्भात चार दिवस ‘यलो अलर्ट’

हवामान विभागाने विदर्भात आणखी चार दिवस ‘यलो अलर्ट’ दिला आहे. त्यामुळे या आठवड्यातही जोरदार पाऊस अपेक्षित आहे. काही जिल्ह्यांमध्ये मुसळधार पावसाचाही इशारा देण्यात आला आहे.