नागपूर : लग्नसराईचे दिवस सुरू असताना पनीरसह इतर भाज्यांचा स्वाद वाढवणाऱ्या मगजचे (टरबूज बीज) भाव आकाशाला भिडले आहेत. सुदानमध्ये सुरू असलेल्या युद्धामुळे भारतात मगज बीची आवक कमी झाल्याने नवे संकट उभे ठाकले आहे. भाव वाढू लागल्याने पनीर आणि इतर भाज्यांचा रस्सा पातळ होऊ लागला आहे.

सुदानमध्ये युद्ध सुरू असून बाजारात टरबूज मगजची आवक खूपच कमी आहे. त्यामुळे व्यापाऱ्यांकडे चांगल्या दर्जाच्या टरबूज मगजचा मोठा तुटवडा आहे. परिणामी, मगजच्या दरात विक्रमी वाढ झालेली आहे. महिन्यापूर्वी ४०० रुपये किलो मिळणारे मगज आता ८०० रुपये किलोवर पोहचले आहे.

भारतातील खपाच्या तुलनेत यावेळी त्याचे उत्पादन कमी असल्याचे सांगण्यात येत आहे. सध्या टरबूज मगजचा साठा मोठ्या प्रमाणात कमी झाला आहे. सुदानमधून टरबुजाच्या बियांची आवक होत नसल्याने देशी मगज बियाण्यांवर ताण वाढल्याचे व्यापाऱ्यांचे म्हणणे आहे. त्यामुळे त्याच्या किमती आणखी वाढू शकतात. रेस्टॉरेट, हॉटेल आणि केटरर्स व्यावसायिकांकडून मगजला सर्वाधिक मागणी असते. लग्न सराईमुळे मागणी वाढू लागली असताना आवक कमी झालेली आहे.

सुदानमधून मगज बीची आवक कमी झालेली आहे. त्यामुळे त्याची टंचाई जाणवू लागल्याने भावात विक्रमी वाढ झालेली आहे. भविष्यात ९०० रुपयापेक्षा अधिक रुपये किलोवर जाण्याचा अंदाज आहे.

किरण दफ्तरी, ड्रायफ्रुट विक्रेते