Nagpur Head Master Arrested While Taking Bribe: कोंढाळीतील मसाळा येथील आश्रमशाळेच्या दोन मुख्याध्यापकांना दीड हजार रुपयांची लाच घेताना अटक करण्यात आली. बिल मंजूर करून पगार काढण्यासाठी लाच घेत असताना लाचलुचपत प्रतिबंधक विभागाने शाळेतीलच २४ वर्षीय सेवकाच्या तक्रारीवरून मंगळवारी ही कारवाई केली. आनंदराव तुकाराम येसनसुरे (वय ४५, रा. वायुसेनानगर, दाभा) व चंद्रकुमार महादेवराव भादे (वय ५६, रा. शिक्षक कॉलनी, कोंढाळी) अशी अटकेतील मुख्याध्यापकांची नावे आहेत.

येनसुरे हे गजबे माध्यमिक आश्रम शाळेचे प्रभारी मुख्याध्यापक तर भाद हे आदिवासी गोवारी शहीद स्मृती प्राथमिक आश्रमशाळेचे मुख्याध्यापक आहेत. तक्रारदार हा मसाळा येथील आदिवासी गोवारी शहीद स्मृति प्राथमिक आश्रमशाळेत सेवक आहे.

त्याचा पगार मिळाला नाही. बिल काढून पगार मंजूर करण्यासाठी येसनसुरे यांनी तक्रारदाराला दोन हजार रुपयांची लाच मागितली. तक्रारदाराने भादे यांच्याशी संपर्क साधला. त्यांनीही दोन हजार रुपये देण्यास सांगितले. सेवकाने एवढी रक्कम देणे शक्य नसल्याचे सांगितले. येसनसुरे यांनी दीड हजार रुपये दिल्याशीवाय काम होणार नाही,असे सांगितले. सेवकाने लाच लुचपत प्रतिबंधक विभागाकडे तक्रार केली. (Latest Marathi News)

अधीक्षक राहुल माकणीकर, अपर अधीक्षक संजय पुरंदरे, सचिन कदम यांच्या मार्गदर्शनाखाली निरीक्षक शिवशंकर खेडेकर,उज्ज्वला मडावी, हेडकॉन्स्टेबल पंकज घोडके, अमोल मेंघरे, प्रफुल्ल बांगडे, प्रिया नेवरे यांनी सापळा रचला. दीड हजार रुपयांची लाच घेताच पोलिसांनी आधी येसनसुरे व नंतर भादे यांना अटक केली. कोंढाळी पोलिस ठाण्यात या दोघांविरुद्ध गुन्हा दाखल करण्यात आला आहे.