नागपूर : शहरात कोरोनाने थैमान घातले असले तरी महापालिकेने डेंगी तसेच मलेरियाबाबतही तपासणी सुरू ठेवली होती. गेल्या वर्षभरात शहरात ९८ डेंगीच्या रुग्णांची नोंद करण्यात आली. याशिवाय मलेरियाचेही पाच रुग्ण आढळून आले.

महापालिकेच्या मलेरिया, फायलेरिया विभागाकडून जानेवारी ते सात डिसेंबरपर्यंत शहरातील ६२६ जणांची तपासणी करण्यात आली. यापैकी ९८ जणांना डेंगी झाल्याचे आढळून आले. जून महिन्यात सतरंजीपुरा झोनमधील प्रभाग २१ मधील प्रेमनगरात एका रुग्णाचा मृत्यू झाला. डेंगीचे सर्वाधिक १८ रुग्ण सप्टेंबर महिन्यात आढळले. ऑगस्ट, ऑक्टोबर आणि नोव्हेंबर महिन्यात प्रत्येकी १६ रुग्णांची नोंद झाली.

सविस्तर वाचा - लग्नाला विरोध केल्याने प्रियकराचे राक्षसी कृत्य; प्रेयसीच्या आजीचा व भावाचा निर्घृण खून

जुलैमध्ये १०, जानेवारीमध्ये ८, जून ७, फेब्रुवारी ४, मे महिन्यात २ रुग्ण आढळून आले. एप्रिल आणि डिसेंबरमध्ये एकाही रुग्णाची नोंद झाली नाही. मलेरियाचे जून व जुलैमध्ये ४ आणि ऑक्टोबरमध्ये १ असे एकूण ५ रुग्ण आढळले आहेत, अशी माहिती मलेरिया व फायलेरिया अधिकारी दिपाली नासरे यांनी दिली.

जानेवारी ते सात डिसेंबर या कालावधीमध्ये मनपाने एक लाख ३३ हजार २१७ जणांची चाचणी केली. यापैकी पाच रुग्णांचा अहवाल मलेरिया पॉझिटिव्ह आला आहे, अशी माहिती नासरे यांनी दिली.

शहराच्या लोकसंख्येच्या तुलनेत शहरातील रुग्णांची संख्या कमी असली तरी नागरिकांनी काळजी घेणे आवश्यक आहे. घरी अथवा परिसरात स्वच्छता राखली जावी याबाबात प्रत्येकाने काळजी घ्यावी, असे आवाहन आयुक्त राधाकृष्णन बी. यांनी केले आहे.

अधिक वाचा - दोन्ही पाय गेले, हात तुटले तरीही जगतोय सन्मानाने, भीक मागून पोट भरणाऱ्यांना दाखविली नवी वाट

काय करावे 

• डासांची पैदास केंद्र बंद करणे 
• घाण होणार नाही याची दक्षता 
• कचऱ्याची विल्हेवाट लावावी

संपादन - नीलेश डाखोरे