नागपूर : शहरात विविध विकासकामे सुरू आहे. उड्डाणपुलांचे काम मोठ्या प्रमाणात सुरू असून, काही अडचणी येतात. पण अधिकारी उत्तम काम करीत आहेत. चांगले काम अधिकाऱ्यांना त्रास देऊ नका, अशा शब्दात केंद्रीय रस्ते वाहतूकमंत्री नितीन गडकरी यांनी स्वपक्षातील लोकप्रतिनिधींचे कान टोचले. काही महिन्यांपूर्वी पूर्व नागपुरातील नगरसेवक व माजी स्थायी समिती सभापती प्रदीप पोहाणे यांनी अधिकाऱ्यांना काळे फासण्याचा प्रयत्न केला होता.

नागपूर-हैदराबाद मार्गावरील चिचभवन येथील अत्याधुनिक रेल्वे ओव्हर ब्रिजचा लोकार्पण सोहळा वर्धा मार्गावरील साऊथ एअरपोर्ट मेट्रो स्टेशनच्या सभागृहात पार पडला. केंद्रीयमंत्री गडकरी यांनी ऑनलाइन पद्धतीने कळ दाबून लोकार्पण केले. त्यावेळी ते बोलत होते. व्यासपीठावर विरोधी पक्षनेते देवेंद्र फडणवीस, महापौर दयाशंकर तिवारी, उपमहापौर मनीषा धावडे, खासदार डॉ. विकास महात्मे, ज्येष्ठ नेते दत्ता मेघे, आमदार कृष्णा खोपडे, आमदार समीर मेघे यांच्यासह इतर आमदार, नगरसेवक, राष्ट्रीय महामार्ग प्राधिकरणचे अधिकारी उपस्थित होते.

अधिक वाचा - ‘मुलांनो, आम्हाला माफ करा; आमचे मृतदेह मेडिकल कॉलेजला दान करा’ अशी चिठ्ठी लिहून दाम्पत्याची आत्महत्या

राज्याचे गृहमंत्री अनिल देशमुख ऑनलाइन पद्धतीने या सोहळ्यात उपस्थित झाले. विविध ठिकाणी आरओबी तयार करून रेल्वे फाटकमुक्त शहर करण्यात आले आहे. परंतु वर्धा मार्गासह विविध ८१ आरओबी रेल्वेच्या आडमुठ्या धोरणामुळे अडकले आहेत. त्यासाठी एक समिती तयार केली आहे. बुटीबोरी ते जाम रस्त्यावरील आरोपी गेल्या १६ वर्षांपासून रखडला असल्याची खंत त्यांनी व्यक्त केली. कामे करताना अनेक अडचणी येतात. परंतु अधिकारी प्रामाणिकपणे काम करीत आहेत.

चांगले काम करणाऱ्या अधिकाऱ्यांना त्रास देऊ नका, असे त्यांनी यावेळी लोकप्रतिनिधींना सांगितले. पुढील वर्षभरात ५० विकास कामांचे उद्‍घाटन करण्यात येईल, असे नमुद करीत त्यांनी महापालिका निवडणुकीसाठी भाजप तयार असल्याचे संकेत दिले. पुढील काही काळात पूर्व नागपुरात ७ तर उत्तर नागपुरात ३ विकास कामांचे भूमीपूजन करण्यात येणार असल्याचे ते म्हणाले. यावेळी त्यांनी शहरातील विविध प्रकल्पाचा पुनरुच्चार केला. विरोधी पक्षनेते देवेंद्र फडणवीस यांनी शहराच्या बदलत्या चेहऱ्यासाठी गडकरी यांची स्तुती केली.

जाणून घ्या - जेवणासाठी बाहेर गेलेल्या मुलाची २८ दिवासांनी फक्त मिळाली कवटी; टी-शर्ट बघताच आईने फोडला हंबरडा

काटोल-नागपूर रस्त्यात वन विभागाचा अडथळा

यावेळी ऑनलाइन पद्धतीने कार्यक्रमात सहभागी झालेले गृहमंत्री अनिल देशमुख यांनी काटोल-नागपूर चारपदरी रस्त्याचे काम लवकरात लवकर सुरू करण्याची विनंती केली. केंद्रीयमंत्री गडकरी यांनी यावेळी या रस्त्यामध्ये वन विभागाचा अडथळा असून त्यांच्याकडे मंजुरीची फाइल असल्याचे सांगितले. वन विभागाकडून मंजुरी घ्या, काटोल येथेच या रस्त्याचे भूमीपूजन करू, असे आश्वासन गडकरी यांनी गृहमंत्री देशमुख यांना दिले.