नागपूर : महापालिका आणि नागपूर पोलिसांच्या संयुक्त विद्यमाने शहरातील नागरिकांच्या ऑक्सिजन तपासणीसाठी सर्वच सरकारी कार्यालयांमधील कर्मचाऱ्यांना सहभागी होण्याचे आदेश देण्यात आले आहेत. त्यामुळे शुक्रवारी कर्मचारीच शिल्लक नसल्याने जवळपास सर्वच सरकारी कार्यालयांचा कारभार बंद होता.

कोरोनामुळे फक्त १५ टक्के कर्मचाऱ्यांना कामावर बोलावण्यात येते आहे. त्यातही त्यांना ऑक्सिजन चाचणीसाठी जुंपण्यात आले आहे. त्यामुळे राज्याच्या सार्वजनिक बांधकाम विभागात दिवसभर एकही कर्मचारी उपस्थित नव्हता. विशेष म्हणजे पोलिस ठाण्यातून सर्व कर्मचाऱ्यांना सूचना देऊन उपस्थित राहण्याचे आदेश देण्यात आले आहेत. प्रत्येकाला फोन करून ठाण्यात बोलाविले जात आहे.

ठाण्यातून सातत्याने फोन येत असल्याने हातचे काम सोडून कर्मचाऱ्यांना ठाणे गाठावे लागले. शहरात एकूण २८ पोलिस ठाणे आहेत. सकाळी सरकारी कार्यालयांमध्ये कोणाला कुठले ठाणे मिळाले याचीच चर्चा होती. विद्यापीठातील कर्मचाऱ्यांनाही बोलविण्यात आले आहे. ज्यांची बदली इतरत्र झाली आहे, त्यांच्याऐवजी जो रुजू झाला त्याने ऑक्सिजन तपासणीसाठी यावे असेही आदेश काढण्यात आले आहेत. कोरोनाचा वाढता प्रादुर्भाव रोखण्यासाठी मधुमेह, रक्तदाब आदी विकाराने ग्रस्त ज्येष्ठ नागरिकांचे व ज्यांना मधुमेह, उच्चरक्तदाबा सारखे आजार आहे त्यांच्या ‘ऑक्सिजन पातळीची चाचणी करण्यात येणार आहे. महापालिका, जिल्हाधिकारी कार्यालय आणि पोलिस कर्मचारी यांच्यासह स्वयंसेवी संस्थांचे प्रतिनिधी घरोघरी जाऊन तपासणी करणार आहेत.

सविस्तर वाचा - पोलिस म्हणाले, ‘तुमच्या घरी चोरी झाली आहे’; कुटुंबीय म्हणाले, ‘होऊच शकत नाही’, नंतर बसला धक्का

सुरक्षेचे काय
आम्हाला घरोघरी जाऊन ऑक्सिजन तपासणी करण्यास सांगण्यात आले आहे. कोरोनाच्या काळात अत्यावश्यक कामे वगळता कोणीही घराबाहेर पडू नये असे आवाहन केले जात आहे. दुसरीकडे गटागटाने लोकांच्या घरी जायला सांगण्यात येत आहे. याकरिता कुठल्याही सुविधा पुरवण्यात आल्या नाहीत. या दरम्यान कोणाला कोरोनाची लागण झाल्यास त्याची जबाबदारी कोण घेणार असा कर्मचाऱ्यांचा सवाल आहे.

संपादन - स्वाती हुद्दार