भिवापूर (जि. नागपूर ) : जवराबोडी गट ग्रामपंचायतच्या सरपंचाविरुद्धच्या अविश्वास प्रस्तावावर रविवारी ग्रामसभेत घेण्यात आलेल्या मतदानात प्रस्तावाच्या समर्थनात ६१ मते अधिक पडल्याने सरपंचाला पायउतार व्हावे लागले. झालेल्या एकूण ३६९ मतदानापैकी प्रस्तावाच्या बाजूने २११, तर विरोधात १५० मते पडलीत. 

हेही वाचा - आता हे काय! आरक्षण निघाले पण उमेदवारच नाही, कोण पाहणार तीन ग्रामपंचायतींचा कारभार?

सरपंच अशोक गोंगल यांच्याविरुद्ध नाराजी असल्याने ग्राम पंचायत सदस्यांनी त्यांच्याविरुद्ध तहसीलदारांकडे अविश्वास प्रस्तावाची मागणी केली होती. या मागणीच्या आधारावर गत १९ जानेवारीला ग्राम पंचायत कार्यालयात विशेष सभेचे आयोजन करून अविश्वास प्रस्तावावर मतदान घेण्यात आले. यात सातपैकी सहा सदस्यांनी प्रस्तावाच्या बाजूने मतदान केले. त्यामुळे प्रस्ताव पारीत झाला. परंतु, सरपंच हे जनतेमधून निवडून आलेले असल्याने ग्रामसभेत अविश्वास प्रस्तावावर मतदान घेण्याचे आदेश जिल्हाधिकाऱ्यांना दिले होते. या आदेशानुसार शुक्रवारी (ता.५) ग्राम पंचायत कार्यालयात ग्रामसभेचे आयोजन करुन अविश्वास प्रस्तावावर मतदान घेण्यात आले. जवराबोडी व किन्हाळा येथील ३६९ मतदारांनी निवडणुकीत भाग घेवून मतदान केले. प्रस्तावाच्या बाजूने २११ तर विरोधात १५० मते पडलीत. ८ मते अवैध ठरविण्यात आलीत. प्रस्तावाच्या बाजूने ६१ मते अधिक पडल्याने अविश्वास प्रस्ताव पारीत होऊन सरपंच गोंगल यांना पायउतार व्हावे लागले. 

हेही वाचा - खुनाच्या घटनेनं हादरली उपराजधानी: उपमुख्यमंत्री जाताच कुख्यात गुंडाचा दगडानं ठेचून खून 

अविश्वास प्रस्तावाची खेळी -
गावाला लागून ग्राम पंचायतच्या मालकिची जवळपास साडेसहा एकर जमीन आहे. या जमिनीवर गावातील काहींनी बेकायदेशीर कब्जा करुन ती बळकावली आहे. सरपंच अशोक गोंगल यांनी ही जमिन अतिक्रमणमुक्त करण्यासाठी जिल्हाधिकाऱ्यांकडे प्रयत्न चालविले होते. ही बाब गावातील काही धुरीणांच्या पचनी पडली नाही. त्यातूनच मग अविश्वास प्रस्तावाची खेळी खेळण्यात आली. प्रस्ताव नामंजूर होऊ नये, यासाठी वरील धुरीणांनी मोठ्या प्रमाणात धनशक्तीचा वापर केल्याचे समजते.