नागपूर : तालुका क्रीडा संकुल सरावासाठी मिळत नसल्यामुळे हिंगणा परिसरातील अनेक खेळाडूंना नाईलाजाने  जीव घोक्यात घालून वर्दळीच्या रस्त्यावर धावण्याचा सराव करावा लागत आहे. अशावेळी चुकून अपघात झाल्यास एखाद्या खेळाडूचा जीव जाण्याची शक्यता नाकारता येत नाही. 

हेही वाचा - मामा-भाचाच्या वयात फक्त चार वर्षांचा फरक; मित्रांसारखे राहत असताना विसरले नात्याचा...

हिंगणा येथे शासनाचे तालुका क्रीडा संकुल आहे. दहा वर्षांपूर्वी मंजूर झालेल्या या संकुलाचे काम निधीअभावी सध्या थंडबस्त्यात आहे. त्यामुळे रनिंग ट्रॅकही पूर्ण होऊ शकला नाही. परिणामतः परिसरातील धावपटूंना नियमित प्रॅक्टिससाठी इकडेतिकडे भटकंती करावी लागत आहे. उल्लेखनीय म्हणजे, संकुलाच्या बाजूलाच कोरोनाचे सेंटर सुरू करण्यात आले आहे. त्यामुळेदेखील त्यांच्या सरावात व्यत्यय येत आहे. नुकत्याच शाळा सुरू झाल्या असून, हळूहळू स्पर्धाही होऊ लागल्या आहेत. त्यामुळे आता सर्वच खेळाडू जोमाने सरावाला भिडले आहेत. 

मिळालेल्या माहितीनुसार, हिंगणा परिसरातील काही क्लबची मुले-मुली सध्या वर्दळीच्या रस्त्यावर सकाळ-संध्याकाळ प्रॅक्टिस करीत आहेत. या मार्गावर वाहनांची सारखी गर्दी राहाते. अशावेळी अपघात होण्याची शक्यता नाकारता येत नाही. सरावासाठी जवळपास चांगली जागा उपलब्ध नसल्यामुळे  नाईलाजाने आम्हाला हा पर्याय निवडावा लागला असल्याचे एका क्लबच्या प्रशिक्षकाने सांगितले. 

नक्की वाचा - श्रद्धा की अंधश्रद्धा? राजदेवबाबांना श्रद्धेपोटी करतात...

सराव मार्गावर खेळाडूंची विशेषतः लहान मुलांची योग्य ती काळजी घेण्यात येत असल्याचेही ते यावेळी म्हणाले. शासनाने खेळाडूंना सरावासाठी लवकरात लवकर तालुका क्रीडा संकुल उपलब्ध करून द्यावे, अशी मागणी या निमित्ताने जोर धरू लागली आहे.

संपादन - अथर्व महांकाळ