गुमगाव (जि. नागपूर):  दरवर्षी डिसेंबर महिना म्हटले की शाळा-महाविद्यालयांमधून शैक्षणिक सहलीसह वार्षिक स्नेहसंमेलनाची  धामधूम असते. परंतू यंदा कोरोना विषाणू संसर्गजन्य परिस्थितीने निर्बंध आले आहेत. सध्या नागपूर शहरासह जिल्ह्यामध्ये ग्रामीण भागातील शाळा १३ डिसेंबरपर्यंत बच्चेकंपनीसाठी 'लॉक'च असल्याने चिमुकल्यांना यंदा सहलीची मज्जा आणि गॅदरिंगचा आनंद लुटता येणार नाही. बच्चेकंपनी मात्र दरवर्षी शाळेत होणाऱ्या सहलीतील 'मज्जा' आणि गॅदरिंगमधील 'धम्माल' मिस करत असल्याचे चित्र पहावयास मिळत आहे. 

सविस्तर वाचा - अमरावतीतील बाळाचे मृत्यूप्रकरण : आईला तीन दिवसांची पोलिस कोठडी; नव्याने नोंदविले जाईल बयाण

दिवाळीनंतर शाळा सुरू झाल्यावर डिसेंबर महिन्यात शालेय विद्यार्थ्यांना शैक्षणिक सहल आणि वार्षिक स्नेहसंमेलांची चाहूल लागते. सहलीमुळे चिमुकल्यांचा उत्साह ओसंडून वाहत असतो. अनोळखी गावाचा प्रवास करताना विद्यार्थी वेगळ्याच विश्वात रममाण होतात. यातून विविध ऐतिहासिक व निसर्गरम्य ठिकाणांचा विद्यार्थ्यांना प्रत्यक्ष अनुभव दिला जातो. 

सहलीसोबतच वार्षिक स्नेहसंमेलनात विद्यार्थ्यांना विविध कलागुण सादर करण्याची मोठी संधी असते. परंतु यंदा मार्च महिन्यापासून शैक्षणिक नियोजन विस्कळीत झाले असल्याने सहल आणि वार्षिक स्नेहसंमेलनाच्या आनंदावर विरजण पडले आहे. गेल्या सात महिन्यांपासून घरीच बसून कंटाळलेली बच्चेकंपनी शाळेचे विश्व प्रत्यक्ष अनुभवता येत नसल्याने हिरमुसली आहेत. सहल, गॅदरिंग, प्रार्थना, शालेय परिपाठ या सगळ्या गोष्टींना 'मिस' करत असल्याचे दिसून येत आहे. 

हेही वाचा - डोळ्यांना कमी दिसत असल्याने सासऱ्याने रक्कम दिली जावयाकडे; मात्र, केला विश्‍वासघात

दिवाळीत थोडीफार उसंत 

यंदा कोरोनाच्या धास्तीतच शैक्षणिक अर्धे सत्र संपले. घरी बसून कंटाळा आलेली मुले कोरोनामुळे सात महिन्यांपासून कुठे पाहुणे म्हणून गेलेली नाहीत. आजोळ, मामाचे गाव अशी उन्हाळा सुट्टीत मजा करण्यासाठी ठरलेली गावे कोरोनामुळे बच्चेकंपनीला या गावांना जाता आलेले नाही. दिवाळी आणि भाऊबीजेला आई वडिलांसोबत थोडेफार बाहेर जायला मिळाले. तीच थोडीफार उसंत. परंतू गेल्या सात महिन्यांपासून गंमतजंमत नावाचा प्रकारच त्यांना अनुभवता येत नसल्याने बच्चेकंपनी हिरमुसली असल्याचे दिसून येते.

संपादन - अथर्व महांकाळ