हिंगणा (जि. नागपूर) : जिल्ह्यातील हिंगणा पोलिस ठाण्यासमोर सिमेंट मिक्सरच्या भरधाव ट्रकने दुचाकीवरील भाजी विक्रेत्याला चिरडले. गीतेश भवसागर (वय १५), असे मृताचे नाव आहे. ही घटना शुक्रवारी सकाळी ९.१५ वाजता घडली. एक जण सुदैवाने बचावला. त्यामुळे कुटुंबीय शोकसागरात बुडाले आहे.

हेही वाचा - सून आणि नातवांनी काढलं घराबाहेर अखेर चिमुकल्यांनी 'तिला' दिला खांदा;...

हिंगणा पंचायत समिती ते गुप्ता हॉटेलपर्यंत सिमेंट रस्त्याचे बांधकाम सुरू आहे. यामुळे बरेच दिवस एकेरी वाहतूक सुरू होती. 'पोलिस ठाण्यासमोर वाहतुकीचा चक्काजाम' असे वृत्त प्रकाशित झाले होते. तरीही पोलिस प्रशासनाला जाग आली नाही. २९ जानेवारी रोजी सकाळी इसासनी भीमनगर येथील भाजीविक्रेता हिमांशू भवसागर व त्याचा लहान भाऊ गीतेश भवसागर हे दुचाकीने भाजी बाजारात जात होते. हिंगणा पोलिस ठाण्यासमोर पोहोचताच भरधाव जात असलेल्या सिमेंट मिक्सर ट्रकने त्यांना धडक दिली. दुचाकी चालवणारा हिमांशू बाहेर फेकला गेल्याने बचावला, तर गीतेश ट्रकच्या चाकाखाली आला. त्याचा घटनास्थळीच मृत्यू झाला. हिंगणा पोलिसांनी पंचनामा करून शव उत्तरीय तपासणीसाठी हिंगणा ग्रामीण रुग्णालयात पाठविले. याप्रकरणी ट्रकचालकाविरुद्ध गुन्हा दाखल केला आहे. 

हेही वाचा - याला म्हणतात विश्वास! सदस्यांनी नाकारले, पण गावकऱ्यांनी स्वीकारले अन् पद जाता-जाता वाचले