नागपूर : दिवाळीच्या तोंडावर कांद्याचे दर कमी झाल्याने ग्राहकांना किंचित दिलासा मिळाला होता. मात्र, दिवाळीच्या सुटीनंतर लासलगाव येथील बाजार समितीत कांद्याचे लिलाव सुरळीत झाल्यानंतर लाल कांद्याला ५१ हजार रुपये उच्चांकी भाव मिळाला. मागील आठवड्याच्या तुलनेत बाराशे रुपयांची वाढ झाली. त्यामुळे स्थानिक बाजारातही कांदा प्रति किलो दहा रुपयांनी महागला आहे. गेल्या आठवड्यात ४० ते ४५ रुपये किलो असलेला कांदा ५० ते ५५ रुपयांवर पोहोचला आहे.

दिवाळीपूर्वी कांद्याच्या वाढत्या दराने सर्वसामान्यांच्या डोळ्यांत पाणी आणले होते. कांद्याचे दर शंभर रुपये किलोच्या घरात जाण्याची शक्यता व्यक्त केली जात होती. मात्र, विदेशातून कांद्याची आयात केल्याने आणि साठवणूक करणाऱ्या व्यापाऱ्यांवर कारवाईचे निर्देश सरकारने दिल्यानंतर भाव घसरले. शेतकऱ्यांकडील कांदा संपत आला असून, गोदामातील कांदाही संपण्याच्या स्थितीत आहे. त्यामुळे आवक कमी झाली. परिणामी भाव वाढले असून, आवक कमी झाली आहे.

सविस्तर वाचा - दुर्दैवी! फराळाचे पदार्थ करताना अचानक घरात पसरला धूर आणि क्षणाधार्त संसाराची झाली राखरांगोळी

नवीन कांदा येण्यास १५ ते ३० दिवसांचा वेळ लागणार आहे. त्यामुळे नवीन वर्ष उजाडेपर्यंत हेच चित्र बाजारात राहण्याची शक्यता व्यक्त केली जात आहे. विदेशात कांद्याची मागणी वाढल्याने लासलगाव रेल्वे स्टेशनवरून पहिल्यांदाच पार्सल व्हॅनने बांगलादेशात कांदा निर्यात केली.

लासलगाव रेल्वे स्थानकातून ४८० मेट्रिक टन कांदा बांगलादेशात निर्यातीसाठी रवाना झाला. त्यामुळे येणाऱ्या दिवसांत अशी निर्यात सुरू राहिल्यास कोसळणाऱ्या कांद्याच्या भावात सुधारणा होण्याची शक्यता आहे.

अधिक वाचा - चला मुलांनो, सोमवारपासून शाळेत या! ऑनलाईन बैठकीत घेतला निर्णय

बटाट्यांचे दर चढेच

बटाट्याचे दर चढेच असून, घाऊक बाजारात नेहमी २० ते २५ रुपये किलो असणारे बटाटे कोरोना काळापासून ३० रुपये किलो दराने विकले जात होते. मात्र, घाऊक बाजारातच बटाटे ३२ ते ३६ रुपये किलो झाल्याने किरकोळ बाजारात एक किलो बटाटे ५० ते ६० रुपये किलो झाले आहेत. सध्या कांदा आणि बटाट्याचे दर सारखेच आहेत. नवीन बटाटे बाजारात येण्यासाठी महिना लागणार आहे. त्यामुळे पुढील महिनाभर बटाटे याच दराने खरेदी करावे लागणार असल्याची माहिती विक्रेते विश्वबंधू गुप्ता यांनी दिली.

संपादन - नीलेश डाखोरे