नागपूर : कोरोनाच्या वाढत्या प्रादुर्भावामुळे महापालिका आयुक्तांनी कठोर पाऊले उचलण्यास सुरवात केली आहे. आतापर्यंत मंगल कार्यालय, लॉनमध्ये क्षमतेच्या ५० टक्के नागरिकांच्या उपस्थितीला परवानगी होती. आता आयुक्त राधाकृष्णन बी. यांनी केवळ २५ टक्के किंवा १०० जणांच्या उपस्थितीलाच परवानगी दिली आहे. एवढेच नव्हे दंडाच्या रकमेतही ५० हजारांपर्यंत वाढ करण्यात आली आहे. हे आदेश आजपासून लागू करण्यात आले आहे.

शहरात मागील काही दिवसांत दररोज पाचशेपर्यंत कोरोनाबाधित आढळून येत आहेत. आयुक्तांनी कठोर पाऊले उचलण्याचे संकेत यापूर्वीच दिले होते. त्यांनी मंगल कार्यालय, लॉन यात होणाऱ्या गर्दीवर नियंत्रण लावण्यासाठी नवे आदेश काढले. मंगल कार्यालय किंवा लॉनमध्ये क्षमतेच्या २५ किंवा १०० व्यक्तींनाच प्रवेश राहणार आहे. त्यामुळे आतापर्यंत मिळालेल्या सवलतीमुळे शेकडो पत्रिका छापून हजारोंच्या संख्येने वऱ्हाड बोलाविण्याच्या बेतात असलेल्यांची निराशा होणार आहे.

जाणून घ्या - ‘मुलांनो, आम्हाला माफ करा; आमचे मृतदेह मेडिकल कॉलेजला दान करा’ अशी चिठ्ठी लिहून दाम्पत्याची आत्महत्या

अनेकांना धुमधडाक्यात लग्न करण्याचा बेत रद्द करावा लागणार आहे. केवळ १०० लोकांमध्येच लग्न लावता येणार आहे. एवढेच नव्हे समारंभासाठी आयुक्त झोनमध्ये सहायक आयुक्तांकडे कार्यक्रमाच्या आठ दिवसांपूर्वी पूर्वसूचना द्यावी लागणार आहे. परवानगी दिलेल्या १०० पेक्षा जास्त नागरिक समारंभात आढळून आल्यास दंडाच्या रकमेतही वाढ करण्यात आली.

निर्देशाचे उल्लंघन करताना पहिल्यांदा सापडल्यास १५ हजार रुपये, दुसऱ्यांदा सापडल्यास २५ हजार तर तिसऱ्यांदा सापडल्यास ५० हजार रुपयांचा दंड मंगल कार्यालय, लॉन संचालकांवर ठोठावण्यात येणार आहे. एवढेच नव्हे समारंभाचे आयोजक वर किंवा वधू पित्यावरही दहा हजारांचा दंड आकारण्यात येणार आहे.

अधिक वाचा - "ज्या चेहऱ्यावर तू घमंड करते तो चेहरा ऍसिड टाकून विद्रूप करून टाकू"; खासदार नवनीत राणा यांना धमकी

सात मंगल कार्यालयांवर दंड

मनपाच्या उपद्रव शोध पथकाने शहरातील सात सभागृहांवर कारवाई केली. लक्ष्मीनगर झोनमधील पराते सभागृह, गोल्डन लिफ लॉन, साईबाबा सभागृह, धरमपेठ झोनमधील कुसुमताई वानखेडे सभागृह, नेहरूनगर झोनमधील जट्टेवार मंगल कार्यालय तसेच सतरंजीपुरामधील प्रीतम सभागृहावर प्रत्येकी पाच हजारांचा दंड ठोठावला. एकूण ३७ हजार रुपयांचा दंड वसूल करण्यात आला.