नागपूर : आठ रिकामे टँकर घेऊन ऑक्सिजन एक्स्प्रेस (Oxygen Express) सोमवारी मध्यरात्री अंगुलच्या दिशेने रवाना झाली. नागपूरहून रिकामी रॅक (Empty rack) पाठविण्याचा ही पहिलीच वेळ आहे. देशाच्या मध्यभागी असलेल्या नागपूरहून रिक्त टँकर पाठविण्याची व्यवस्था झाल्याने ऑक्सिजन पुरवठ्यात लागणारा वेळ वाचणार असून रुग्णांसाठी ही दिलासादायक बाब आहे. (Oxygen Express departed with eight empty tankers)

देशातील पहिली ऑक्सिजन ट्रेन नागपूरमार्गे धावली. या एक्स्प्रेसमधील टँकरची पहिली खेप मिळण्याचा पहिला मानही नागपूरलाच मिळाला. देशासाठी हा पथदर्शी प्रकल्प ठरला. मुंबईहून रिक्त रॅक पाठविण्यात मोठा वेळ लागत असल्याची व त्यासाठी खर्चही अधिक करावा लागत असल्याने नागपूर स्टेशनवरून रिक्त रॅक पाठविण्याची व्यवस्था करण्यात आली होती. प्रथमच नागपूरहून रिक्त ऑक्सिजन एक्स्प्रेस ओडिसाच्या अंगूलला पाठविण्यात आली. तिथून ऑक्सिजन भरून ती गरजेच्या ठिकाणी पाठविण्यात येईल.

ऑक्सिजन एक्स्प्रेस संदर्भातील घटनाक्रम

देशातील पहिली ऑक्सिजन एक्स्प्रेस विशाखापटनमहून २३ एप्रिलला नागपुरात दाखल झाली. या ट्रेनमधून तीन टँकर प्राणवायू नागपूरला मिळाला. त्यानंतर ८, ९, १३, १४ व १५ मे रोजी पोहोचलेल्या ऑक्सिजन एक्सप्रेससह आलेले ४ टँकर नागपूरला मिळाले. १२ मे रोजीसुद्धा नागपूरला ही ट्रेन पोहोचली होती. पण, राज्य सरकारच्या सूचनेनुसार ती थेट पुण्याला पाठवून देण्यात आली.

(Oxygen Express departed with eight empty tankers)