Pain Relief For Thalassemia and Sickle Cell Affected Children: रक्ताशी निगडित आनुवंशिक सिकलसेल आजाराचा गड असलेल्या विदर्भात रुग्णांना एकाच छताखाली अद्ययावत उपचारातून या आजाराचे निर्मूलन व्हावे. हे शासनाचे ध्येय असून खुद्द मुख्यमंत्री देवेंद्र फडणवीस यांनी आरोग्य व कौशल्य विकास क्षेत्रातील अग्रगण्य स्वंयसेवी संस्थेच्या सहकार्यातून सिकलसेलशी झुंजणाऱ्या बालरुग्णांच्या वेदना कमी करण्याचा आराखडा तयार केला आहे.

सिकलसेल, थॅलसेमिया हा गरिबांचा दुर्लक्षितांचा आजार, अशी ओळख निर्माण झाली आहे. यासाठी एक्सलंस सेंटर तयार करण्यावरही भर देण्यात आला होता. दरम्यान भावी पिढीला या आजारातून मुक्त करण्यासाठी त्यांचे आरोग्य सुदृढ व्हावे या उद्देशाने सिकलसेल, थॅलेसेमियाचे निर्मुलन होऊन त्या बालरुग्णांना वेळेत उपचार उपलब्ध व्हावेत, यासाठी फडणवीस सरकारकडून प्रयत्न सुरू आहेत. आनंदाची बाब अशी की, या प्रयत्नांना यश येत असून सेवाभावी संस्था स्वतः पुढाकार घेऊन बाल रुग्णांच्या आरोग्यासाठी आरोग्यदायी उपक्रमात सहभागी झाल्या आहेत.

३२४ बालरुग्णांवर उपचार

गेल्या वर्षभरात थॅलेसेमियाच्या १४८ व सिकलसेलच्या १७६ बालरुग्णांवर डॉ. रुघवानी यांच्या केंद्रात उपचार करण्यात आले. तसेच दरवर्षी साधारण सिकलसेलग्रस्त ३०० बालरुग्णांवर उपचार करण्यात येणार आहेत.

विदर्भातील ११ जिल्ह्यांत राबविणार उपक्रम

नागपूरचे डॉ. विंकी रुघवानी २०१० सालापासून समर्पणाच्या भावनेतून थॅलसेमिया व सिकलसेल निर्मूलनाचा सेवाभावी उपक्रम राबवीत आहेत. नागपुरातील थॅलसेमिया आणि सिकलसेल सेंटर, हे थॅलसेमिया आणि सिकलसेल सोसायटी ऑफ इंडिया संस्थेद्वारे चालविण्यात येतात. या उपक्रमातून डॉ. रुघवानी यांच्या सेवाभावी उपक्रमाला आर्थिक बळ देऊन थॅलसेमिया आणि सिकलसेलबाधित मुलांवर नियमित उपचार करण्यात येतील.